قىزىلوردادا ءبىر كۇندە 6600 تۇرعىن جەر تەلىمىنە يە بولدى

قىزىلوردا. قازاقپارات - بۇگىن قىزىلوردادا ينجەنەرلىك ينفراقۇرىلىمى تولىق جەتكىزىلگەن، اۋماعى 980 گەكتاردى قۇرايتىن جاڭا «بايتەرەك» اۋدانى اشىلدى.

جەكە تۇرعىن ءۇي سالۋ ءۇشىن 6600 ازاماتقا جەر تەلىمى بەرىلدى. استانا كۇنى قارساڭىندا وتكەن اۋقىمدى شاراعا ايماق باسشىسى قىرىمبەك كوشەربايەۆ قاتىستى.

جاڭا ىقشام اۋداندا 25 كيىز ءۇي تىگىلىپ، ۇلتتىق سپورت تۇرلەرىنەن جارىستار ۇيىمداستىرىلدى. سونىمەن قاتار تۇرمىسى تومەن 200 وتباسىعا جەرگىلىكتى كاسىپكەرلەردىڭ دەمەۋشىلىگىمەن ازىق-تۇلىك تاراتىلدى. سونىمەن قاتار وسى كۇنى قالانىڭ جاپپاسباي باتىر كوشەسىندە 60 پاتەرلىك كوپقاباتتى تۇرعىن ءۇيدىڭ ىرگەتاسى قالاندى. بۇل اپاتتىق جاعدايداعى ۇيلەردە تۇراتىن تۇرعىندارعا تابىستالاتىن ءۇي بولماق. وسىلايشا اپپاتتىق جاعدايداعى ۇيلەر تۇرعىندارىنىڭ ماسەلەسى كەلەسى جىلى تولىعىمەن شەشىمىن تابادى. بۇگىن جانە «تيتوۆ» قىستاعىندا 60 جاس وتباسىنا جاڭا پاتەردىڭ كىلتى بەرىلدى.

تۇرعىنداردىڭ قۋانىشىنا ورتاقتاسقان قىرىمبەك كوشەربايەۆ: «باسپانالى بولۋ، ونىڭ ءىشىن جانعا تولتىرۋ - ادام ءومىرىنىڭ ۇلكەن قۋانىشى. سوڭعى 3 جىلدا تەك قانا  قىزىلوردا قالاسىندا 82 كوپقاباتتى ءۇي تۇرعىزىلىپ، 3502 تۇرعىنعا پاتەر كىلتى تابىستالدى. بۇل - جىلدار بويى جەكە باسپانا كۇتكەن، اسىل ارماندارىنا جەتىپ، قونىس تويىن تويلاعان وتباسىلاردىڭ سانى. بيىلدىڭ وزىندە، بۇيىرسا، 44 مىڭنان اسا پاتەر بولاتىن 67 كوپقاباتتى تۇرعىن ءۇيدىڭ قۇرىلىسىن بىتىرەمىز»، - دەدى.

ال «بايتەرەك» اۋدانىنا بولاشاقتا ورتا ەسەپپەن 36 مىڭنان اسا جۋىق تۇرعىن قونىستانادى دەپ كۇتىلۋدە.

ايتا كەتەيىك، قىزىلوردا قالاسىندا جەرگە كەزەكتە تۇرعان 49 مىڭ تۇرعىننىڭ ءبىر مەزەتتە 6600 نە جەكە تۇرعىن ءۇي قۇرىلىسى ءۇشىن جەر تەلىمدەرىن تابىستاۋ ايماق، قالا تاريحىندا بۇرىن- سوڭدى بولعان ەمەس.