بۋراباي ۇلتتىق پاركىندە جىل سايىن 65 گەكتار القاپقا اعاش وتىرعىزىلادى
بۇل جايىندا پارك ورمانشىسى قايىرباي بالتابايەۆ ايتتى، دەپ حابارلايدى قازاقپارات ءتىلشىسى.
«نەگىزىندە اعاشتاردى ورتتەن كەيىنگى اۋماققا، اۋرۋ اعاشتاردى وتاعان جەرلەرگە وتىرعىزامىز. ياعني، ورماندى قالپىنا كەلتىرەمىز. جىل سايىن تابيعي پارك اۋماعىنداعى 65 گەكتار القاپقا قاراعاي، قايىڭ ەگەمىز. ورمانداردى جايلاستىرۋ ماتەريالدارىنا ساي جۇمىس جۇرگىزەمىز. ون جىلعا ارنالعان جوسپارىمىز بار. وندا قانداي القاپقا اعاشتىڭ قاي ءتۇرىن جانە نەشەۋىن ەگۋ قاجەتتىگى انىق كورسەتىلگەن»، - دەدى قايىرباي بالتابايەۆ پاركتىڭ ورتكە قارسى ءىس- شارالارىمەن تانىسۋ ءۇشىن كەلگەن باق وكىلدەرىنە بەرگەن سۇحباتىندا.
ورمانشىنىڭ دەرەگىنشە، ەگىلگەن اعاشتاردىڭ 70 پايىزى جەرسىنىپ، جايقالىپ وسەدى.
«قازىرگى ۋاقىتتا كۇزگى تۇگەندەۋ جۇرگىزىلىپ جاتىر. كوكتەمدە وتىرعىزىلعان اعاشتاردىڭ نەشەۋى جەرسىنگەنى ەسەپتەلەدى. سودان كەيىن كەلەسى جىلى تاعى قانشا اعاشتى قوسىمشا وتىرعىزۋ قاجەتتىگى انىقتالادى. جوسپارىمىزعا سايكەس، ءبىر گەكتار جەرگە 8 مىڭ ءتۇپ اعاش وتىرعىزىلادى»، - دەدى ول.
سونىمەن قاتار قايىرباي بالتابايەۆ قاراعايدان تۇقىم مەن كوشەت الۋ پروتسەسىنىڭ تەحنولوگياسىن ءتۇسىندىرىپ ءوتتى.
«تەحنولوگياعا سايكەس، الدىمەن قاراعاي بۇرشىگىن جينايمىز. ودان كەيىن ونى وڭدەۋگە جىبەرىپ، تۇقىم الامىز. سول تۇقىمدى ءوزىمىزدىڭ ءتالىمباقتا ەكى جىل ءوسىرىپ، كوكتەمدە پارك اۋماعىنداعى الدىن الا بەلگىلەنگەن جەرگە وتىرعىزامىز»، - دەدى ورمانشى.
ايتا كەتەيىك، ق ر پرەزيدەنتى ءىس باسقارماسىنا قارايتىن «بۋراباي» مەملەكەتتىك ۇلتتىق تابيعي پارك اۋماعى 129 مىڭ گەكتاردان استام جەردى الىپ جاتىر.
