وتكەن جىلى اسىل تۇقىمدى مال ءوسىرۋ كەشەندەرىن قۇرۋ ءۇشىن 65 مىڭعا تارتا ءىرى قارا اكەلىندى

بۇل تۋرالى بۇگىن ق ر اۋىل شارۋاشىلىعى ۆيسە- ءمينيسترى گۇلميرا يسايەۆا ءمالىم ەتتى.

ۆيسە- ءمينيستردىڭ ايتۋىنشا، 2015 - جىلى اسىل تۇقىمدى مال ءوسىرۋ كەشەندەرىن قۇرۋ باعىتى بويىنشا 64,9 مىڭ ءىرى قارا مال اكەلىنگەن، بۇل - جوسپاردىڭ % 93 - ىن قۇرادى.

«2015 - جىلى ەت وڭدەۋ ۇلەسى 31 پايىزدى قۇرادى، ءسۇت وڭدەۋ - 39 پايىز. مال شارۋاشىلىعى ءونىمىن تۇتىنۋ قۇرىلىمىندا يمپورت ۇلەسى كەمىگەن. اسىل تۇقىمدى مالدى ساتىپ الۋ كولەمىن ازايتۋ شەشىمى شىعارىلدى. سەبەبى قازاقستاندىق اسىل تۇقىمدى مال ءوسىرۋ كەشەندەرىنىڭ مالدارىنا سۇرانىس ارتقان»، - دەدى گ. يسايەۆا مينيسترلىكتىڭ القا ماجىلىسىندە.

سونىمەن قاتار، ۆيتسە- ءمينيستردىڭ سوزىنە قاراعاندا، فەرمەرلىك شارۋاشىلىقتاردى دامىتۋدى كوزدەيتىن «سىباعا» باعدارلاماسىن ورىنداۋ جوسپاردان 121 پايىزعا اسىپ تۇسكەن.

«بۇگىندە ءىرى قارانىڭ 277 مىڭ انالىق باسى ساتىپ الىنعان. مال بورداقىلاۋ ورىندارىن سالۋ بويىنشا - 177 مىڭ مالعا جەمدەۋ ورىندارى اشىلعان. وسى كورسەتكىشتەر بويىنشا بەسجىلدىق جوسپار بارلىق وڭىرلەردە ارتىعىمەن ورىندالىپ وتىر»، - دەپ اتاپ ءوتتى گ. يسايەۆا.

 اۆتور: جاسۇلان جولدىبايەۆ