وڭتۇستىكتەن سولتۇستىككە قونىس اۋدارۋشىلار ءۇشىن 6587 كۆوتا ءبولىندى

نۇر- سۇلتان. قازاقپارات - شەكارا ماڭىنداعى وڭىرلەردى دامىتۋ جونىندەگى دەربەس باعدارلامانى ازىرلەۋدىڭ قاجەتتىلىگى جوق.
None

بۇل جايىندا سەنات دەپۋتاتتارىنىڭ ساۋالىنا بەرىلگەن ق ر پرەمەر- ءمينيسترىنىڭ ورىنباسارى ەرالى توعجانوۆتىڭ جاۋابىندا ايتىلعان، دەپ حابارلايدى قازاقپارات ءتىلشىسى.

«مەملەكەت باسشىسىنىڭ تاپسىرماسىنا سايكەس قازاقستان رەسپۋبليكاسىنىڭ 2022-2026 -جىلدارعا ارنالعان كوشى- قون ساياساتى تۇجىرىمداماسىنىڭ جوباسى ازىرلەندى»، - دەپ اتاپ وتەدى جاۋابىندا ۇكىمەت باسشىسىنىڭ ورىنباسارى.

ونىڭ دەرەگىنشە، تۇجىرىمدامادا كوشى- قون پروتسەستەرىن رەتتەۋگە باعىتتالعان كەلەسى ناقتى ءىس- شارالار قاراستىرىلعان:

− وڭتۇستىك وڭىرلەردەن سولتۇستىككە جۇمىس كۇشىن تارتقان كاسىپورىنداردىڭ شىعىستارىن وتەۋ؛

− وبلىس ىشىلىك جانە ءوڭىرارالىق قونىس اۋدارۋدى ىنتالاندىرۋ؛

− ءتۇرلى سەبەپتەرمەن ءومىر سۇرۋگە قولايسىز ەلدى مەكەندەردىڭ تۇرعىندارىنا كوشۋگە جاردەمدەسۋ؛

− قونىس اۋدارۋشىلارعا اۋىل شارۋاشىلىعىمەن اينالىسۋ ءۇشىن جەر ۋچاسكەلەرىن بەرۋ؛

− سولتۇستىك وڭىرلەرگە قونىس اۋدارعان قانداستارعا ازاماتتىق العاننان كەيىن تۇرعىن ۇيگە كەزەگىن ساقتاۋ.

«قۋاتتى وڭىرلەر - ەل دامۋىنىڭ درايۆەرى» ۇلتتىق جوباسىن ىسكە اسىرۋ ارقىلى 2026 -جىلعا دەيىن سولتۇستىككە قونىس اۋدارعان ازاماتتاردىڭ جۇمىسپەن قامتۋ دەڭگەيىن 87 پايىزعا دەيىن جەتكىزۋ كوزدەلگەن. ينفراقۇرىلىمدىق جوبالاردى ەڭبەك رەسۋرستارىمەن قامتاماسىز ەتۋ ءۇشىن وڭتۇستىك ايماقتاردان 35 مىڭ ادامدى تارتۋ جوسپارلانعان. ەڭبەك كۇشى تاپشى وڭىرلەردى قولداۋ ماقساتىندا ەڭبەك جانە حالىقتى الەۋمەتتىك قورعاۋ مينيسترلىگى جىل سايىن وڭتۇستىكتەن سولتۇستىككە قونىس اۋدارۋشىلاردىڭ كۆوتاسىن بەكىتەدى. بيىلعى جىلى كۆوتا 6587 ادامدى قۇرادى»، - دەدى ەرالى توعجانوۆ.

سونىمەن بىرگە ۆيتسە- پرەمەر پارلامەنت سەناتىنىڭ «ءوڭىر» دەپۋتاتتىق توبىنىڭ باستاماسىمەن مىناداي ءىس- شارالار پىسىقتالىپ جاتقانىن العا تارتالى:

− قونىس اۋدارۋشىلارعا مەملەكەتتىك تۇرعىن ءۇي قورىنان تۇرعىن ءۇي، سونداي- اق جەكە تۇرعىن ءۇي قۇرىلىسى ءۇشىن جەر ۋچاسكەلەرىن (اۋدانى كەمىندە 0,1 گ ا) بەرۋدى جەڭىلدەتۋ؛

− قاجەتتى ماماندىقتار بويىنشا جۇمىسقا ورنالاساتىن قونىس اۋدارۋشىلار، سونداي- اق ولاردىڭ جۇمىس بەرۋشىلەرى تۇرعىن ءۇي سالۋ كەزىندە ءوز قاراجاتى ەسەبىنەن جۇمساعان شىعىندارىن وتەۋ (كەمىندە % 50)؛

− سۋبسيديالارعا قول جەتكىزۋ ءۇشىن قونىس اۋدارۋشىلاردىڭ كرەديت بەرەشەگىنە كانيكۋلدار بەلگىلەۋ (مەرزىمى 6 ايدان 1 جىلعا دەيىن).

«باياندالعاننىڭ نەگىزىندە شەكارا ماڭىنداعى وڭىرلەردى دامىتۋ جونىندەگى دەربەس باعدارلامانى ازىرلەۋدىڭ قاجەتتىلىگى جوق دەپ سانايمىز»، - دەلىنگەن پرەمەر- ءمينيستردىڭ ورىنباسارىنىڭ جاۋابىندا.

اۆتور: مارلان جيەمباي

سوڭعى جاڭالىقتار