جاڭا «نۇرلى جەر» باعدارلاماسى اياسىندا 650 مىڭ وتباسى باسپانالى بولادى - اسقار مامين
«2019-جىلى شامامەن 13 ميلليون شارشى مەتر تۇرعىن ءۇي سالۋ جوسپارلانعان. بۇل وتكەن جىلعى كورسەتكىشتەن 500 مىڭ شارشى مەترگە ارتىق. سونىمەن قاتار، تۇرعىن ءۇي باعدارلاماسىنىڭ نەگىزگى مىندەتتەرىنىڭ ءبىرى الەۋمەتتىك باعىتقا نەگىزدەلگەن. جىل سايىن 6 مىڭ از قامتىلعان وتباسى مەن 3 مىڭ جۇمىس ىستەيتىن جاستاردى باسپانامەن قامتاماسىز ەتۋ مىندەتتەمەسىن الدىق. مامىردان باستاپ ونى ىسكە اسىرۋعا كىرىستىك. بارلىق زاڭنامالىق نورمالار قابىلدانىپ، قاجەتتى قاراجات ءبولىندى»، - دەدى اسقار مامين ۇكىمەت وتىرىسىندا.
وسى ورايدا ۇكىمەت باسشىسى الەۋمەتتىك باعىتتاعى تۇرعىن ءۇي كولەمىن تولىعىمەن بەرۋ جانە ساتىپ الۋ بويىنشا ناقتى شارالاردى قابىلداۋ كەرەكتىگىن تاپسىردى.
بۇدان بولەك، پرەمەر-مينيستر تۇرعىن ءۇيدى سالۋعا، ينجەنەرلىك ينفراقۇرىلىمدى جەتكىزۋگە ۋاقتىلى دايىندالۋدىڭ ماڭىزى زور ەكەنىن اتاپ ءوتتى.
«مەملەكەت باسشىسى بارلىق تۇرعىن ءۇي باعدارلامالارىن ءبىرتۇتاس تۇرعىن ءۇي ساياساتىنا بىرىكتىرۋدى تاپسىردى. سوندىقتان بيىل 2025-جىلعا دەيىنگى جاڭا «نۇرلى جەر» مەملەكەتتىك باعدارلاماسى قابىلدانادى، ونىڭ اياسىندا 650 مىڭعا جۋىق وتباسى نەمەسە 2 ميلليوننان استام ادام جاڭا تۇرعىن ۇيمەن قامتاماسىز ەتىلەدى»، - دەدى اسقار مامين.
وسى ورايدا يندۋستريا جانە ينفراقۇرىلىمدىق دامۋ مينيسترلىگىنە مۇددەلى مەمورگاندارمەن جانە ۇيىمدارمەن بىرلەسىپ، قىركۇيەكتە ءتيىستى قاۋلى جوباسىن ۇكىمەتكە ەنگىزۋدى جۇكتەدى.
بۇدان بۇرىن حابارلانعانداي، ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى رومان سكليار وسى جىلى 6 اي ىشىندە تۇرعىن ءۇي قۇرىلىسىنا 605,7 ميلليارد تەڭگە ينۆەستيتسيا تارتىلعانىن اتاپ ءوتتى.
بۇل 2018-جىلعى دەڭگەيدەن 15,5 پايىزعا جوعارى. 1 تەڭگە مەملەكەتتىك قاراجاتقا 7,4 تەڭگە جەكە ينۆەستيتسيا تارتىلدى. بيىلدىڭ سوڭىنا دەيىن 118 مىڭ باسپانا (13 ميلليون شارشى مەتر) سالۋدى جوسپارلادىق. جارتىجىلدىق قورىتىندى بويىنشا 48925 باسپانا (5,7 ميلليون شارشى مەتر) پايدالانۋعا بەرىلدى.