قورعاس شەكارا ماڭىندا وتكەن جارمەڭكەگە 6500 دەن اسا قىتاي ازاماتتارى كەلدى
ناۋرىز مەرەكەسىنە وراي وتكەن اۋىل شارۋاشىلىعى ونىمدەرىنىڭ جارمەڭكەسىندە وتاندىق تاۋار كورمەسى دە ۇيىمداستىرىلدى.
وبلىستىق كاسىپكەرلىك جانە يندۋستريالدى يننوۆاتسيالىق دامۋ باسقارماسى مەن وڭىرلىك «اتامەكەن» كاسىپكەرلەر پالاتاسى، «قورعاس» ش ى ح و قىزمەتكەرلەرى ۇيىتقى بولعان شاراعا 40 تان اسا كاسىپكەر قاتىستى.
ولار ەت، ءسۇت، كونديتەرلىك ونىمدەرمەن قاتار تابيعي تازا بال جانە باسقا دا ازىق-تۇلىك تۇرلەرىن كەلۋشىلەرگە ۇسىندى.
شەكارا ماڭىنداعى مەرەكەدە ۇلتتىق ويىندار دا شارا كوركىن قىزدىردى. بالۋاندار قازاق كۇرەسىنەن باسەكەگە تۇسسە، ات قۇلاعىندا وينايتىن بىلەكتى دە جۇرەكتى جىگىتتەر كوكپار تارتىستى. قوس مەملەكەتتىڭ كوكپارشىلارى قاتىسقان دودادا وتانداستارىمىز الدىنا جان سالمادى.
ال، اۋىل شارۋاشىلىعى ونىمدەرىنىڭ جارمەڭكەسى الداعى ۋاقىتتا دا وتەتىن بولادى. ايتا كەتۋ كەرەك، 2016-جىلى قىتاي ەلىنىڭ تۇتىنۋشىلارى جالپى قۇنى 436 ميلليون دوللارعا قازاقستاندىق تاۋار ونىمدەرىن الدى.
اۆتور: سامال قابىشەۆا
