10:36, 16 - تامىز 2016 | GMT +5
ارحەولوگتار 6500 جىل بۇرىن جاسالعان التىن القا تاپتى
استانا. قازاقپارات - التىن بولگاريالىق ارحەولوگتار پازاردجيك قالاسىنىڭ ماڭىنان وسىدان 6500 جىل بۇرىن جاسالعان التىن القانى تاپتى. عالىمداردىڭ زەرتتەۋىنشە، بۇل وسىعان دەيىنگى تابىلعان القالاردىڭ ىشىندەگى ەڭ ەسكىسى ەكەن.

بۇعان دەيىن ۆارناداعى كونە قورىمنان تابىلعان التىن ەڭ ەسكى زامانعا تيەسىلى دەپ سانالعان ەدى. عالىمدار ءبىزدىڭ داۋىرىمىزگە دەيىنگى 5 مىڭجىلدىقتا جەر وڭدەۋمەن اينالىسقان ادامداردىڭ التىننان بۇيىم جاساۋدى قايدان ۇيرەنگەنىن بىلە الماي، تاڭعالىسقان بولاتىن. پازاردجيكتەن تابىلعان جادىگەر بولسا ۆارنا التىنىنان ەكى عاسىر بۇرىن جاسالعانى انىقتالىپ وتىر.
پازاردجيك قورىمىنان التىن القامەن قاتار، كوپتەگەن قىش بۇيىمدار، مۇسىندەر، ىدىس- اياقتار تابىلىپتى. ارحەولوگتار بۇل جەردەگى قازبا جۇمىستارىن ءالى بىرنەشە جىل جۇرگىزۋدى جوسپارلاپ وتىر. ولار بۇل قورىمدا قولا داۋىرىندەگى بالقان وركەنيەتىنىڭ جادىگەرلەرى ساقتالعان دەپ سانايدى.
نۇريسلام اسقار
«ەگەمەن قازاقستان»