65 جىل تاكسي قىزمەتىن كورسەتىپ كەلگەن 83 جاستاعى قاريا بىردە ءبىر رەت جول ەرەجەسىن بۇزباعان
قاراعاندى. KAZINFORM - قاراعاندى وبلىسىنىڭ قارقارالى اۋدانىندا 83 جاستاعى تاكسيست اقساقال تۇرادى. تىلەۋقور قاناپيا ۇلىنىڭ كوزى 100 پايىز كورەدى. جولداعى شۇرىق تەسىكتى الىستان اڭعارادى. تاكسي قىزمەتىن كورسەتكەن 65 جىلدا بىردە ءبىر رەت جول ەرەجەسىن بۇزىپ كورمەپتى.

قارقارالى اۋماعىندا تىلەۋقور اتانى تانىمايتىن ادام كەمدە كەم. كولىگىنىڭ ءىشى جىلى، جولاۋشى ءۇشىن جايلى. قاجەت دەسەڭىز جاندى داۋىستا ءان دە شىرقاپ بەرەدى.
«ەگەر مەن ۇيدە وتىرسام، اۋىرىپ قالامىن. كەيىن كولىگىمە بارىپ، رولگە وتىرعاندا بىردەن ەنەرگيا مەن كوڭىل-كۇي پايدا بولادى. ماعان وسىلاي جەڭىل. بالالارىم وسى كۇنگە دەيىن جولدا ءجۇرىپ كەلدىڭ، ەندى دەمال دەپ ايتادى. ءبىراق بۇل ءىسىمدى قالدىرا المايمىن»، - دەيدى تىلەۋقور قاناپيا ۇلى.
ونىڭ كۇن ءتارتىبى تىعىز. قارقارالى قالاسى مەن نۇركەن اۋىلى اراسىندا كۇندە جۇرەدى. قاجەت بولسا، قاراعاندى، ۇلىتاۋ وبلىستارى بويىنشا جولاۋشىنى دىتتەگەن جەرىنە جەتكىزەدى.
«وتە سەنىمدى كولىك. قايدا بارسام دا تىلەۋقور اتانى شاقىرتامىن. سەبەبى، ەشقاشان جولدا قالدىرىپ كورگەن جوق. كولىگى كۇيلى. جول بويى اڭگىمەلەسىپ، تاريحتى ايتىپ، اۋىلدىڭ پروبلەمالارىن دا قوزعاپ قويامىز»، - دەيدى اۋىل تۇرعىنى قايدار تولەۋتايەۆ.
كولىكتى العاش 18 جاسىندا تىزگىندەگەن. سودان بەرى 65 جىل بويى تاكسيست بولىپ ەڭبەك ەتىپ كەلەدى. وسى كاسىپتىڭ ارقاسىندا وتباسىن اسىرادى، بالالارىن وقىتىپ، ۇيلەندىردى.

«وسىلاي تاكسي جۇرگىزىپ ءجۇرىپ، اقشا جيناپ 9 كولىك ساتىپ الدىم. وزىمە جانە بالالارىما ءبىر- بىردەن كولىك مىنگىزدىم. بۇل مەنىڭ وسى جۇمىسىمنىڭ ارقاسىندا. ۇلىما پاتەر ساتىپ الۋ ءۇشىن 5 مىڭ دوللار جيناپ بەردىم. مەنىڭ جۇمىسىمدا ەڭ باستىسى - قاۋىپسىزدىك. ەگەر ادام ۇيىقتاماسا، بۇل اپاتقا اكەلۋى مۇمكىن. ەگەر جول ەرەجەلەرىن ساقتاپ جۇرسەڭ، ەشقانداي قيىندىققا تاپ بولمايسىڭ. مەن مۇنىڭ ءتىرى مىسالىمىن»، - دەيدى تىلەۋكور قاناپيا ۇلى.
تىلەۋقور اتانىڭ كولىگىنىڭ جاعدايى ۇنەمى باقىلاۋىندا. اقاۋ تابىلىپ جاتسا لەزدە جوندەپ الادى. ول جول ەرەجەسىن بۇزىپ كورمەگەن تاكسيست. جولعا شىقپاس بۇرىن 8 ساعات تىنىعىپ الادى. بۇل ونىڭ باستى ءپرينتسيپى. قاريا جاياۋ ءجۇرۋدى داعدىعا اينالدىرعان. قاقاعان ايازدىڭ وزىندە تازا اۋادا 3 شاقىرىم جۇرەدى. بۇل كوبىنەسە تاكسيستەرگە پايدالى، دەيدى زەينەتكەر. تاڭعى جاتتىعۋ دا كۇن تارتىبىنەن تۇسپەيدى.
«ەگەر كۇندەلىكتى جاتتىعۋ جاساماسام، وسى 83 جاسىمدا وسىنداي تىڭ بولىپ جۇرمەس ەدىم. بوس ۋاقىتىم بولا قالسا، جاتتىعۋ جاسايمىن. كۇندە تاڭەرتەڭ جانە كەشكە ۋاقىتىمدى سپورتقا ارنايمىن. تاۋ جاققا بارىپ ءجۇرىپ كەلەتىنىم دە بار. تاكسي جۇرگىزۋشىلەرىن سالاۋاتتى ءومىر سالتىن ۇستانۋعا شاقىرامىن»، - دەيدى تىلەۋقور قاناپيا ۇلى.
قاريانىڭ باتانىڭ قولما قول سۋىرىپ شىعاراتىن ەرەكشە تالانتى دا بار. ءار ءسوزىن ىنتىماق، بەرەكە جاقسىلىققا باعىتتايدى. تىلەۋقور قاناپيا ۇلى 8 بالا تاربيەلەپ، وسىرگەن. 32 نەمەرە مەن 23 شوبەرەنىڭ اتاسى. ءقازىر اقوشقى بولىمشەسىنەدە تۇراتىن شوبەرەلەرىن نۇركەن اۋىلىنداعى مەكتەپكە تاسىمالداپ، الاڭسىز ءبىلىم الۋىنا جاعداي جاساپ ءجۇر.
وسىعان دەيىن تۇركىستاندا 74 جاستاعى قاريا 45 كەلىلىك بورەنەنى كوتەرىپ، ءدۇيىم جۇرتتى تاڭعالدىرعانى جايلى جازعان ەدىك.