استانانىڭ شەتكەرى اۋداندارىنا 65 شاقىرىم جول مەن 136 شاقىرىم ينجەنەرلىك جەلى سالىندى

استانا. قازاقپارات - استانانىڭ شەتكەرى اۋداندارىن دامىتۋ قولعا الىنۋدا. وسى ماقساتتا 2010-جىلدان باستاپ استانا قالاسىنىڭ شەتكەرى اۋداندارىن دامىتۋ تۇجىرىمداماسى جۇزەگە اسىرىلا باستادى. قۇجات بويىنشا جولدار مەن ينجەنەرلىك جەلىلەردى سالۋ، سونىمەن قاتار تۇرعىن ءۇي الابتارىندا ادامدارعا قولايلى جاعداي جاساۋدى كەشەندى تۇردە ىسكە اسىرۋ قاراستىرىلعان.

«ەلوردانىڭ تۇرعىن الابتارىندا ينجەنەرلىك جەلىلەردى قالپىنا كەلتىرۋ جانە جوندەۋ، جولدار سالۋ جۇمىستارى قولعا الىندى. جالپى، 150 مىڭعا جۋىق ادام تۇراتىن 20 تۇرعىن الابىن قامتۋ كوزدەلگەن. بۇگىنگى تاڭدا 232 شاقىرىم جول سالىندى. 2011-2013 ج ج. 15 تۇرعىن الابىندا ءتيىستى جۇمىستار قارقىندى جۇرگىزىلىپ، 65,3 شاقىرىم جول مەن 136 شاقىرىم ينجەنەرلىك جەلى جاڭادان سالىندى. 5 تۇرعىن الابىندا جۇمىستار تولىعىمەن اياقتالدى»، - دەدى استانا قالاسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ باسشىسى راشيد امانجولوۆ قالالىق ءماسليحاتتا.

قازىر كوممۋنالدىق شارۋاشىلىق باسقارماسى وڭتۇستىك-شىعىس شاعىن اۋدانىن اباتتاندىرىپ جاتىر.

«2011-جىلدان بەرى وڭتۇستىك-شىعىس شاعىن اۋدانىنىڭ وڭ جاعىن اباتتاندىرۋ جوباسى جۇزەگە اسىرىلۋدا. جۇمىستاردىڭ باسىم بولىگى اياقتالدى. قازىرگى كەزدە 600 دەن استام ءۇي تولىعىمەن ينجەنەرلىك جەلىلەرمەن قامتاماسىز ەتىلدى»، - دەدى استانا قالاسىنىڭ كوممۋنالدىق شارۋاشىلىق باسقارماسىنىڭ باسشىسى پاۆەل كۋلاگين.

ايتا كەتەيىك، تۇرعىن الابتارىن ورتالىقتاندىرىلعان جىلىتۋ جۇيەسىنە قوسۋ استانا قالاسىنىڭ شەتكەرى اۋداندارىن دامىتۋدا ماڭىزدى. بۇل ج ە و-3 ىسكە قوسىلعاننان كەيىن مۇمكىن بولماق. جىلۋ ورتالىعىنىڭ ءبىرىنشى كەزەگىن 2016-2017 ج ج. جىلىتۋ ماۋسىمىندا تاپسىرۋ جوسپارلانعان، دەپ حابارلانعان ەلوردا اكىمدىگىنىڭ رەسمي سايتىندا.