09:02, 16 - تامىز 2021 | GMT +6
تۇركياداعى سۋ تاسقىنىنان قازا تاپقان ادام سانى 64 كە جەتتى
انكارا. انادولى- قازاقپارات - تۇركيانىڭ قارا تەڭىز جاعالاۋىنداعى سۋ تاسقىنى سالدارىنان 64 ادام قازا تاپتى، دەپ حابارلايدى قازاقپارات انادولى اگەنتتىگىنە سىلتەمە جاساپ.
تۇركيا ۇكىمەتى جانىنداعى توتەنشە جاعدايلاردىڭ الدىن الۋ جانە باسقارۋ باسقارماسىنىڭ (AFAD) مالىمەتىنشە، كاستامونۋ پروۆينسياسىندا 54 ادام، سينوپ پروۆينسياسىندا 9 ادام اپات قۇربانى بولدى، تاعى ءبىر ادام بارتين پروۆينسياسىندا كوز جۇمدى.
قازىرگى ۋاقىتتا ەمدەۋ كۋرسىن تابيعي اپاتتان زارداپ شەككەن 8 ادام جالعاستىرۋدا. تۇركيانىڭ سولتۇستىگىندە 11-تامىزدا تولاسسىز جاۋعان جاڭبىر سەل، كوشكىن جانە سۋ تاسقىنىنا سەبەپ بولدى. مەملەكەت باسشىسى رەجەپ تايىپ ەردوعان سۋ تاسقىنىنان زارداپ شەككەن اۋدانداردى تابيعي اپات ايماعى دەپ جاريالادى.