وتكەن جىلى استاناعا 640 مىڭنان استام تۋريست كەلگەن

استانا. قازاقپارات -ەل ورداسى - استانا 17 جىلدىڭ ىشىندە ەلىمىزدىڭ ءىرى تۋريستىك ورتالىعىنا اينالدى.

2014 - جىلى قالاعا 642,1 مىڭ تۋريست كەلگەن، سونىڭ ىشىندە ەلگە كەلۋشىلەر تۋريزمىنىڭ جەلىسى بويىنشا - 145,5 مىڭ تۋريست، ىشكى تۋريزم جەلىسى بويىنشا - 440,9 مىڭ تۋريست، دەپ حابارلايدى قالا اكىمىنىڭ باسپا ءسوز قىزمەتى.

سوڭعى جىلدارى كىرىس تۋريزمى ارقىلى استاناعا كەلگەن تۋريستەر سانى ارتىپ كەلەدى: 2011 -جىلى 105,9 مىڭ ادام بولسا، 2014 - جىلى 145,5 مىڭ ادامعا دەيىن ارتقان. ىشكى تۋريزمنىڭ ۇلەس سالماعى 2011 - جىلى 373,5 مىڭ ادام بولسا، 2014 - جىلى 440,9 مىڭ ادامعا دەيىن كوبەيگەن.

استانا قالاسى تۋريزم، دەنە شىنىقتىرۋ جانە سپورت باسقارماسىنىڭ حابارلاۋىنشا، قالادا 297 تۋريستىك فيرما جۇمىس ىستەيدى. نەگىزىنەن، ولار تاياۋ جانە قيىر شەت ەلدەردە ەلوردالىقتاردىڭ دەمالىسىن ۇيىمداستىرادى. تۋريستىك فيرمالاردىڭ باسىم بولىگىنىڭ اۆياكاسسالارى، كەيدە ت/ج كاسسالارى بولادى.

ەلگە كەلۋشىلەر تۋريزمى بويىنشا تۋريستىك قىزمەتتەر نارىعىندا نەگىزىنەن شەتەل ازاماتتارىن ۆيزالىق قولداۋ، قوناق ۇيگە دەيىنگى ترانسفەرتتەر جانە اۋدارماشى قىزمەتى ۇسىنىلادى. بىرنەشە شەت تىلىندە ەكسكۋرسيا ۇيىمداستىرۋ، اۆتوموبيلدى جالعا الۋ قىزمەتى دە كەڭىنەن تاراپ وتىر.

«استانا - مەنىڭ وتانىمنىڭ ەلورداسى» اتتى كەڭ اۋقىمدى الەۋمەتتىك جوبا جىل سايىن جۇزەگە اسىرىلىپ كەلەدى. جوبا اياسىندا قازاقستاننىڭ ءار وڭىرىنەن 500 بالا ەلورداعا كەلەدى.

ناقتىراق ايتقاندا، حالىقتىڭ الەۋمەتتىك وسال توپتارىنا جاتاتىن بالالار، وقۋ مەن سپورت وزاتتارى. ەكى كۇندىك تانىمدىق، ويىن- ساۋىق باعدارلاماسىنا ەلوردانىڭ كورىكتى جەرلەرىن ارالاۋ كىرەدى. «كوچيەۆنيك» تۋريستىك كومپانياسىمەن بىرلەسىپ «Astana Bus Tours» جوباسىنىڭ ەكى قاباتتى قىزىل اۆتوۋبستارىمەن قالادا ەكسكۋرسيا ۇيىماستىرىلدى.

استانا قالاسى تۋريزم، دەنە شىنىقتىرۋ جانە سپورت باسقارماسى قالانىڭ تۋريستىك يميدجىن قالىپتاستىرۋ ماقساتىندا قازاقستان رەسپۋبليكاسىنىڭ رەسمي دەلەگاتسياسىنىڭ قۇرامىندا لوندون، مادريد، ستامبۋل، ماسكەۋ، بەرلين، گونكونگ (شياڭگاڭ)، دۋباي قالالارىندا وتكەن حالىقارالىق كورمەلەرگە قاتىستى.

BNews.kz