يەمەندەگى قاقتىعىستاردان 6400 ادام اجال قۇشتى
جارالانعاندار سانى 30 مىڭنان اسادى. ال 2 ميلليون 800 مىڭعا جۋىق تۇرعىن وتانىن تاستاپ، باس ساۋعالاپ كەتۋگە ءماجبۇر بولعان. بۇل تۋرالى ب ۇ ۇ باس حاتشىسىنىڭ كومەكشىسى مالىمدەدى. ونىڭ ايتۋىنشا قازىرگى تاڭدا ەلدە 14 ميلليوننان استام ادام مەديتسينالىق كومەككە مۇقتاج. سەبەبى، ەمحانالاردىڭ دەنى قيراعان نەمەسە جۇمىسىن توقتاتقان.
ب ۇ ۇ جانىنداعى بالالار قورىنىڭ مالىمەتى بويىنشا يەمەندە جىل سايىن 5 جاسقا تولماعان 10 مىڭ ءبۇلدىرشىن دەرتىنە داۋا تاپپاي قازا تابادى. ايتا كەتەيىك، ەل پرەزيدەنتى مانسۋر حاديدىڭ جاقتاستارى مەن بۇلىكشى حۋسيتتەر اراسىنداعى قاقتىعىستار 2014 -جىلدىڭ تامىزىنان بەرى جالعاسىپ كەلەدى. بىلتىر ناۋرىزدا بۇلىكشى توپتى توقتاتۋ ءۇشىن پرەزيدەنتتىڭ سۇراۋىمەن قاقتىعىسقا ساۋد ارابياسى باسقاراتىن كولاتسيانىڭ اۋە كۇشتەرى قوسىلدى. ال 10 -ساۋىردە ەلدە وق اتپاۋ رەجيمى ەنگىزىلدى. ەندى 18 -ساۋىردەن باستاپ ۇكىمەت پەن بۇلىكشى توپ اراسىندا كەلىسسوزدەر باستالماق.
www.24.kz
