رەسەيلىك 64 جاستاعى كەيۋانا 73 جەتىم بالانى اسىراپ وسىرگەن
بۇل تۋرالى كەشە رەسەيلىك «ءبىرىنشى ارنانىڭ» «مۋجسكوە-جەنسكوە» تەلەجوباسىندا كورسەتىلدى.
رەسەيدەگى جەتىم بالالاردىڭ وتباسىلىق بالالار ۇيلەرىندە تاربيەلەنۋىنە بەلگىلى بالالار جازۋشىسى، قوعام قايراتكەرى، رەسەي بالالار قورىنىڭ ءتوراعاسى، اكادەميك البەرت اناتوليەۆيچ ليحانوۆ مۇرىندىق بولعان ەكەن. 1988- جىلى ونىڭ باستاماسىمەن ەلدە 578 وتباسىلىق بالالار ۇيلەرى اشىلىپ، 5 مىڭعا تارتا جەتىم بالالار وتباسىلارىندا انالاردىڭ مەيىرىم-شۋاعىنا بولەنگەن.
وسى باستاماعا العاشقىلاردىڭ ءبىرى بولىپ ءۇن قاتقان التىن جۇرەكتى انا تاتيانا ۆاسيليەۆنا كۇيەۋى ميحايل سوروكين ەكەۋى وسى جىلى العاشقى 5 جەتىم بالانى قامقورلىعىنا العان. بۇگىندە وسىناۋ ۇلكەن شاڭىراقتا تاتۋ-ءتاتتى ءومىر ءسۇرىپ، جاپىراق جايعان 73 بالانىڭ ءبىرازى ازامات بولىپ، ات جالىن تارتىپ، ۇيلەنگەن، وقۋ بىتىرگەن، جۇمىسقا ورنالاسقان.
ولاردىڭ اراسىندا مۇگەدەك جاندار دا از بولماعان، ولار انا مەيىرىمى مەن شۋاعىنىڭ ارقاسىندا سالاۋاتتى ازاماتتار ساناتىنا قوسىلعان. ولاردىڭ وزىنەن باقىتتى انا 25 نەمەرە ءسۇيىپ وتىر.
ءبىر قىزىعى، وسى وتباسىندا تاربيەلەنگەن بالالاردىڭ بىردە-ءبىرى قىلمىسقا ۇرىنباعان، سالاۋاتتى ازامات بولىپ ءوسىپ-ءونىپ، جاقسى تاربيە العان.
تاتيانانىڭ وزىنەن تۋعان قىزى اننا دا بۇگىندە 10 بالا ءوسىرىپ وتىر، ولاردىڭ دا كوپشىلىگى جەتىم بالالار. ال ءسىڭلىسى وسىنداي 32 بالا تاربيەلەپ وتىر.
تاتيانا ءۇشىن ەش بالانىڭ بوتەندىگى جوق. ۇلكەن شاڭىراقتىڭ وسىناۋ ۇلگىسىنە حابارعا قاتىسقانداردىڭ تاڭدانىسى زور بولدى. جاقىندا عانا كۇيەۋىن جەر قوينىنا تاپسىرعان ابزال انا بۇدان بىلاي دا قامقورلىققا مۇقتاج جانداردى قاناتىنىڭ استىنا الىپ، سولار ءۇشىن ءومىر سۇرمەك.
