قازاقستاندا جەڭىل كولىكتەردى جالعا الۋ كولەمى 63 پايىزعا ارتتى
Finprom.kz مالىمەتىنشە، جالعا الۋ، جالعا بەرۋ جانە ليزينگ بويىنشا قىزمەتتەردىڭ كولەمى تومەندەپ كەلەدى. كوپتەگەن جىلدان بەرى العاش رەت كورسەتكىش 16 پايىز مينۋسقا كەتكەن. دەگەنمەن، جەڭىل اۆتوموبيلدەردى جالعا الۋداعى قىزمەت كولەمى بىردەن 63 پايىزعا ارتىپ وتىر. 2021 -جىلدىڭ قاڭتار- ماۋسىمىندا جالعا الۋ، جالعا بەرۋ جانە ليزينگ قىزمەتتەرىنىڭ كولەمى 254,4 ميلليارد تەڭگەنى قۇرادى.
بارلىق قىزمەتتەردىڭ تورتتەن ءۇشى 3 وڭىرگە تيەسىلى: نۇر-سۇلتان (96,2 ميلليارد تەڭگە)، اتىراۋ وبلىسى (51 ميلليارد تەڭگە) جانە الماتى قالاسى (44,8 ميلليارد تەڭگە).
قىزمەتتىڭ اۋقىمدى كولەمى ماڭعىستاۋ (15,9 ميلليارد تەڭگە)، باتىس قازاقستان (11,2ميلليارد تەڭگە) جانە قاراعاندى وبلىستارىندا دا (9,8 ميلليارد تەڭگە) بايقالادى. ال ەڭ تومەنگى كورسەتكىش تۇركىستان وبلىسىندا تىركەلگەن، نەبارى 250,2 ميلليون تەڭگە عانا. قىزمەت قۇرىلىمىندا جەڭىل اۆتوموبيلدەر مەن جەڭىل اۆتوكولىك قۇرالدارىن جالعا الۋ كولەمى ايتارلىقتاي جوعارى.
ەسەپتى كەزەڭدە ول 52,1 ميلليارد تەڭگەنى قۇراپ، جىل ىشىندە 61,4 پايىزعا ارتىپ وتىر. ودان كەيىنگى ورىندا جۇك كولىكتەرىن (26 ميلليارد تەڭگە)، قۇرىلىس ماشينالارى مەن جابدىقتارىن (14,8 ميلليارد تەڭگە) الۋ تۇر. ال سەكتورلاعى قىزمەتتەردىڭ ماردىمسىز كولەمى اۋە كولىك قۇرالدارى ليزينگىنە تيەسىلى. نەبارى 97 مىڭ تەڭگە عانا.
سونىمەن قاتار ۆيدەو كاسسەتالار مەن ديسكتەردى جالعا بەرۋ 2,7 ميلليون تەڭگەنى، اقپاراتتىق تەلەكوممۋنيكاتسيالىق جۇيەلەر ءۇشىن كومپيۋتەرلەر مەن سىرتقى جابدىقتار ليلينگى 4,9 ميلليون تەڭگەنى قۇرادى.
