الماتى وبلىسىنىڭ 63 تۇرعىنى مەملەكەتتىك سىيلىقتارمەن ماراپاتتالدى - فوتو
ماراپاتتار تالدىقورعانداعى ءى. جانسۇگىروۆ اتىنداعى مادەنيەت سارايىندا وتكەن سالتاناتتى جيىن بارىسىندا ۇسىنىلدى.
- سىزدەردى ەلىمىزدىڭ ۇلتتىق مەرەكەسى - قاسيەتتى تاۋەلسىزدىك كۇنىمەن شىن جۇرەكتەن قۇتتىقتايمىن! تاۋەلسىز قازاقستان قىسقا مەرزىم ىشىندە قۋاتتى دا گۇلدەنگەن مەملەكەت قۇرۋدا ۇلكەن تابىستارعا قول جەتكىزدى. ءتيىمدى دە باسەكەگە قابىلەتتى ەكونوميكانىڭ نەگىزى قالاندى، - سالتاناتتى جيىندا وبلىس اكىمى ا. باتالوۆ. - قازاقستاننىڭ جەتىستىكتەرى مەن الەمدىك دەڭگەيدەگى جوعارى باعاسى - پرەزيدەنتىمىز نۇرسۇلتان ءابىش ۇلى نازاربايەۆتىڭ ساياسي ەرىك- جىگەرىنىڭ، زور ەڭبەگىنىڭ ناتيجەسى.
العا قويعان مىندەتتەردى ورىنداۋ ءۇشىن ءبىزدىڭ الەۋەتىمىز جەتكىلىكتى، مۇمكىندىگىمىز مول. ەل تاۋەلسىزدىگىنىڭ 25 جىلدىعىن ناقتى ناتيجەلەرمەن، قوماقتى تابىسپەن قارسى الامىز، - دەدى ءوڭىر باسشىسى.
سونىمەن قاتار اماندىق باتالوۆ ءوز سوزىندە پرەزيدەنتتىڭ تاپسىرمالارىنىڭ ورىندالۋ بارىسىنا دا توقتالىپ ءوتتى.
- مەملەكەت باسشىسىنىڭ قانت قىزىلشاسىن، جۇگەرى مەن اپورتتى قايتا جاڭعىرتۋ جونىندەگى تاپسىرماسى ساتىمەن ىسكە اسىرىلىپ كەلەدى.
«100 ناقتى قادام» ۇلت جوسپارى اياسىندا ءبىز ينۆەستيتسيا تارتۋعا باسا كوڭىل ءبولىپ وتىرمىز. بۇل ءۇشىن ءبىز وتاندىق بيزنەستىڭ جەتەكشى وكىلدەرىمەن ءبىرقاتار كەزدەسۋلەر وتكىزدىك. كەزدەسۋ بارىسىندا ولار 140 ۇسىنىس جاساپ، جالپى سوماسى 532 ميلليارد تەڭگەنى قۇرايتىن 75 ينۆەستجوبا ىسكە اسىرىلا باستادى، ناتيجەسىندە 9912 جۇمىس ورنى اشىلادى.
الداعى ۋاقىتتا شاعىن جانە ورتا بيزنەستىڭ بەلسەندىلىگىن ارتتىرۋ جانە «باستى وندىرىستەردى»، اگروونەركاسىپتىك كەشەندى ودان ءارى دامىتۋ ارقىلى تۇرعىنداردى ەڭبەكپەن قامتۋعا باسا نازار اۋدارامىز، - دەپ اتاپ كورسەتتى ءوڭىر باسشىسى.
قۇتىقتاۋ سوزدەن سوڭ مەملەكەتتىك جانە قوعامدىق قىزمەتتەگى ەسەلى ەڭبەگى، ەلىمىزدىڭ الەۋمەتتىك- ەكونوميكالىق جانە مادەني دامۋىنا قوسقان ۇلەسى، حالىقتار دوستىعىن نىعايتۋداعى بەلسەندىلىگى ءۇشىن وبلىستىق باسقارمالاردىڭ باسشىلارى، دەنساۋلىق ساقتاۋ، ءبىلىم بەرۋ، اۋىل شارۋاشىلىعى، ونەركاسىپ پەن كاسىپكەرلىك سالاسىندا ەڭبەك ەتىپ جۇرگەن ازاماتتار، وڭىردەگى بەلگىلى قوعام قايراتكەرلەرى اكىمنىڭ قولىنان ناگرادالار الدى. ولارعا، اتاپ ايتقاندا «قۇرمەت»، «پاراسات»، III دارەجەلى «ەڭبەك داڭقى» وردەندەرى، «ەرەن ەڭبەگى ءۇشىن»، «شاپاعات» مەدالدارى مەن قازاقستان رەسپۋبليكاسىنىڭ قۇرمەت گراموتاسى، «قازاقستاننىڭ ەڭبەك سىڭىرگەن قايراتكەرى» اتاعى جانە مەرەكەلىك مەدالدار بەرىلدى. جالپى العاندا ءوڭىردىڭ 63 تۇرعىنى مەملەكەتتىك سىيلىقتارمەن ماراپاتتالدى.
سالتاناتتى جيىن سوڭى مەرەكەلىك كونسەرتكە جالعاستى.
