اتىراۋ وبلىسىندا 62 مەديتسينا قىزمەتكەرى كوروناۆيرۋس جۇقتىرعان
وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى گۇلنافيس تانبايەۆانىڭ مالىمەتىنە سۇيەنسەك، 62 مەديتسينا قىزمەتكەرىنەن COVID-19 تابىلعان.
قازىر ونىڭ 17 ءسى ينفەكتسيالىق ستاتسيونارعا جاتقىزىلعان. قاۋىپتى ىندەتكە شالدىققاندارمەن بايلانىسقان تۇلعالار اپتا سايىن ۆيرۋسقا تەست تاپسىرادى.
ولاردىڭ كۇندەلىكتى دەنە قىزۋى ولشەنىپ، تەكسەرىلەدى. جرۆي بەلگىلەرى پايدا بولعان جاعدايدا جەدەل تۇردە اناليز الىنادى.
«دارىگەرلەردە كوروناۆيرۋس ينفەكتسياسىن جۇقتىرۋ ءقاۋپى باسىم. ويتكەنى، COVID-19 ىندەتىمەن كۇرەستە دارىگەرلەر، مەدبيكەلەر، كىشى بۋىن مەدقىزمەتكەرلەرى، سانيتارلار، ينفەكتسيونيست- ماماندار العى شەپتە ەڭبەك ەتىپ ءجۇر. كوپشىلىگى بىرنەشە ايدان بەرى جاقىندارىن كورمەگەن. بۇل مورالدىق تۇرعىدان وتە قيىن. ءبىز مەديتسينا قىزمەتكەرلەرىنىڭ وسىنداي جانكەشتى ەڭبەگى مەن كاسىبىنە ادالدىعىنا العىس ايتامىز. قازىرگى ۋاقىتتا ولارعا تاۋلىگىنە 6 ساعات جۇمىس ىستەۋ ءۇشىن اۋىسىمدىق جۇمىس ءادىسى ۇيىمداستىرىلدى. سونداي-اق، ولاردىڭ جۇمىستان كەيىن دەمالۋى ءۇشىن بارلىق جاعداي قاراستىرىلىپ وتىر»، - دەيدى گۇلنافيس تانبايەۆا.
بۇدان بۇرىن اتىراۋدا ۇلتتىق ساراپتاما ورتالىعى فيليالىنىڭ ديرەكتورى مەن 13 قىزمەتكەرى كوروناۆيرۋس جۇقتىرعانىن جازعان ەدىك.
