تالدىقورعانعا 62 ميلليارد تەڭگە ينۆەستيتسيا تارتىلدى
بۇل وتكەن جىلمەن سالىستىرعاندا 11 ميلليارد تەڭگەگە ارتىق. ءارى ونىڭ 50 پايىزدان استامى جەكەمەنشىك قاراجات. بۇگىن بۇل جونىندە قالا اكىمى باعدات قاراسايەۆتىڭ حالىق الدىندا ەسەپ بەرۋ جيىنىندا ءمالىم بولدى، دەپ حابارلايدى قازاقپارات ءتىلشىسى.
قالادا كاسىپكەرلىكپەن اينالىسۋشىلار قاتارى كوبەيىپ كەلەدى. شاعىن جانە ورتا بيزنەسپەن ەكونوميكالىق بەلسەندى حالىقتىڭ 30 پايىزى، ياعني 26 مىڭنان اسا ادام شۇعىلدانادى. ولار بىلتىر 50 ميلليارد تەڭگەدەن اساتىن ءونىم ءوندىرىپ، بيۋدجەتكە 7,3 ميلليارد تەڭگە ءتۇسىم تۇسىرگەن.
بايانداما بارىسىندا قالا اكىمى بارلىق سالانى قامتىپ شىقتى. جارىس سوزگە جازىلعاندار دا ءوز پىكىرلەرىن ورتاعا سالىپ، قالانىڭ دامۋ دەڭگەيىن جوعارى باعالادى. سونداي-اق، كوكەيدەگى ماسەلەلەرىن سۇراپ، وعان قاناعاتتانارلىق جاۋاپ الدى. جيىندى قورىتىندىلاعان الماتى وبلىسىنىڭ اكىمى اماندىق باتالوۆ قالا دامۋىنداعى ءبىرقاتار كەمشىلىكتەرگە توقتالدى.
ول قالانى گازداندىرۋ ءۇشىن جەلىلەر تارتۋ جۇمىستارىنىڭ باياۋ جۇرگىزىلىپ جاتقانىن، يندۋستريالدىق ايماقتاعى كاسىپورىنداردىڭ ازدىعىن جانە قالانىڭ وڭتۇستىك-باتىس بولىگىندەگى ينفروقۇرىلىمى تارتىلىپ قويعان «جەتىسۋ» ا ك ك ۇ ك» ا ق- عا تيەسىلى 600 گە تارتا جەر تەلىمىنىڭ ءالى كۇنگە بوس تۇرعانىن سىنعا الدى.
«جەر ءجانناتى - جەتىسۋ دەسەك، ونىڭ جاقۇتى - تالدىقورعان! قالامىز بۇگىنگىدەن دە ادەمى، كورىكتى، حالىققا قولايلى بولسىن! وسى باعىتتاعى جۇمىستاردى جۇيەلەپ اتقارۋ كەرەك. جۇمىستاردى جىلدامداتۋ قاجەت!» دەپ اتاپ وتكەن وبلىس باسشىسى قالا اكىمىنىڭ بىلتىر اتقارعان جۇمىسىنا قاناعاتتانارلىق دەپ باعا بەردى.
اۆتور: سامال قابىشيەۆا
