11:54, 27 - شىلدە 2016 | GMT +6
اقمولا وبلىسىنىڭ اكىمى پوليتسياعا 62 كولىكتىڭ كىلتىن تاپسىردى
كوكشەتاۋ. قازاقپارات - اقمولا وبلىسىنىڭ اكىمى سەرگەي كۋلاگين كوكشەتاۋدا بارلىق دەڭگەيدەگى اكىمدەر مەن جەرگىلىكتى پوليتسيا قىزمەتىنىڭ قىزمەتكەرلەرىنىڭ قاتىسۋىمەن ءوتىپ جاتقان سەمينار-كەڭەستىڭ ەكىنشى كۇنى جەرگىلىكتى پوليتسيا قىزمەتىنىڭ بولىمشەلەرىنە سۋ جاڭا 62 كولىكتىڭ كىلتىن تاپسىردى.
ونىڭ ىشىندە جول-پاترۋلدىك پوليتسيا قىزمەتىنە 20 «كيا تسەراتو» جانە پوليتسيانىڭ ۋچاسكەلىك ينسپەكتورلارى بولىمشەلەرىنە 42 «نيۆا» كولىگى بەرىلىپ وتىر.
«بۇگىن جەرگىلىكتى پوليتسيا قىزمەتى ءۇشىن ايتۋىلى وقيعا. سىزدەردىڭ جۇمىستارىڭىز اۆتوكولىكسىز ەلەستەتۋ وتە قيىن. سوندىقتان ءبىز بۇگىنەن باستاپ، جەرگىلىكتى پوليتسيا قىزمەتىنىڭ ماتەريالدىق-تەحنيكالىق پاركىن جاقسارتۋدى قولعا الىپ وتىرمىز»، - دەدى شارا بارىسىندا وبلىس اكىمى.
سونىمەن قاتار ايماق باسشىسى الداعى ۋاقىتتا دا وسىنداي يگى ىستەردىڭ جالعاسىن تاۋىپ، مەملەكەتتىك ورگانداردىڭ اۆتوپاركىنىڭ نىعايتىلا بەرەتىنىن جەتكىزدى.
اۆتور: اسلان وسپانوۆ
