قازاقستاندا 628 پانا ىزدەۋشى جانە 333 بوسقىن بار

استانا. قازاقپارات - ميگرانتتاردى تىركەيتىن ءبىرىڭعاي جۇيەنى قۇرۋ باعىتىندا اقپاراتتىق جۇيەلەر بىرىكتىرىلىپ جاتىر.

بۇل تۋرالى ۇكىمەت وتىرىسىندا كوشى-قون ساياساتى تۇجىرىمداسىن ىسكە اسىرۋ بارىسىن تالقىلاۋ كەزىندە پرەمەر-ءمينيستردىڭ ورىنباسارى - ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى قازاقپارات ءتىلشىسى.

«بيىلعى 1-شىلدەدەگى مالىمەت بويىنشا ەلىمىزدە 628 پانا ىزدەۋشى جانە 333 بوسقىن بار. بىرىككەن ۇلتتار ۇيىمىنىڭ بوسقىندار ءىسى جونىندەگى جوعارعى كوميسسارىنىڭ ورتالىق ازياداعى ايماقتىق باسقارماسىمەن بىرلەسىپ، جوعارى ايتىلعان ازاماتتاردىڭ الەۋمەتتىك قۇقىقتارى قورعالۋىن قامتاماسىز ەتۋ، جۇمىسقا ورنالاستىرۋ، مەديتسينالىق جانە الەۋمەتتىك كومەك كورسەتۋ شارالارى ازىرلەندى»، - دەدى ت. دۇيسەنوۆا.

ونىڭ ايتۋىنشا، كوشى-قون ۇدەرىسىن رەتتەۋ جۇيەسىن تسيفرلاندىرۋ باسىم باعىتتاردىڭ ءبىرى بولىپ سانالادى. قازىر كوشى-قون اعىندارىن ەسەپكە الۋ بىرنەشە مەملەكەتتىك ورگاننىڭ اقپاراتتىق جۇيەلەرىندە قامتىلىپ وتىر.

«سوندىقتان ميگرانتتاردى تىركەيتىن ءبىرىڭعاي جۇيەنى قۇرۋ ماقساتىندا جۇيەلەردىڭ ءبارىن ءوزارا ينتەگراتسيالاۋعا كىرىستىك. قازىردىڭ وزىندە رەسەي فەدەراتسياسى، موڭعوليا، تۇرىكمەنستانداعى مەكەمەلەرىمىز ءۇشىن «قانداس» اتتى جاڭا فۋنكتسيونالدى اۆتوماتتاندىرىلعان اقپاراتتىق جۇيە ىسكە قوسىلدى. تاعى 26 ەلدى قوسۋ جوسپارلانعان»، - دەدى مينيستر.

بۇدان بۇرىن حابارلانعانداي، قازاقستانعا نەگىزىنەن قاي ەلدىڭ ازاماتتارى قونىس اۋدارىپ جاتقانى انىقتالدى.