بيىل 622 ورالمان وتباسى قازاقستاننىڭ سولتۇستىگىنە قونىس اۋدارادى
بۇل تۋرالى ۇكىمەتتە وتكەن باسپا ءسوز ءماسليحاتىندا ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ءمالىم ەتتى، دەپ حابارلايدى «قازاقپارات» ح ا ا ءتىلشىسى.
«بىزدە شەتەلدەن جۇمىس كۇشىن تارتۋ باعىتىندا بولىنەتىن كۆوتالار بار. بيىل ونداي كۆوتالارعا ءوتىنىم بەرۋشىلەردىڭ سانى 41 مىڭ. ياعني، بۇل كورسەتكىش - ەكونوميكالىق بەلسەندى تۇرعىنداردىڭ 0,6 پايىزى. ەكىنشىدەن، قازاقستاننىڭ سولتۇستىگىنە ورالمانداردى كوشىرۋ بويىنشا بەرىلەتىن كۆوتالار بار. بيىل 622 ورالمان وتباسى قازاقستاننىڭ سولتۇستىك جانە ورتالىق وڭىرلەرىنە كوشۋگە ءوتىنىم بەردى. البەتتە، ولارعا ناقتى ماماندىق بويىنشا جۇمىس ۇسىنىلماق»، - دەيدى تامارا دۇيسەنوۆا.
مينيستر سونىمەن بىرگە، ايماقتىق دەڭگەيدە، ياعني ءبىر وبلىستان ەكىنشى وبلىسقا كوشىپ كەلۋشىلەردىڭ سانى ارتىپ بارا جاتقانىن اتاپ ءوتتى.
«جۇمىس ورىندارى از وڭىرلەردەن كوپ ايماقتارعا كوشۋگە نيەت بىلدىرگەندەر كوبەيىپ كەلەدى. بيىل قازاقستاننىڭ باسقا وڭىرلەرىنەن سولتۇستىكتەگى قوستاناي، پاۆلودار، سقو، اقمولا وبلىستارىنا كوشۋگە 1706 وتباسى نيەت ءبىلدىردى. بىلتىر سولتۇستىك وڭىرلەرگە كوشۋگە وزگە وبلىستاردان 380 وتباسى عانا ءوتىنىم بەرگەن بولاتىن. اتالعان وڭىرلەر كوشىپ كەلۋشىلەرگە ناقتى قانداي جۇمىس ورىندارى بار ەكەنى، باسپانا ماسەلەسى تۋرالى اقپارات بەرىپ جاتىر»، - دەدى مينيستر.
