62 توم جينالعان: شەرزات ىسىنە قاتىستى قىلمىستى تەرگەۋ اياقتالدى

قونايەۆ. KAZINFORM - الماتى وبلىسىنىڭ پوليتسيا دەپارتامەنتى كامەلەتكە تولماعان بالانى ءولتىرۋ فاكتىسى بويىنشا قىلمىستى تەرگەۋ اياقتالعانىن حابارلادى.

تاراپتار قىلمىستىق ءىس ماتەريالدارىمەن تولىق تانىسىپ، ءىس سوتقا جىبەرۋ ءۇشىن پروكۋرورعا جولدانعان.

پوليسيا مالىمەتىنشە، تەرگەۋ بارىسىندا 40 سوت ساراپتاماسى جۇرگىزىلىپ، شامامەن 200 كۋاگەردەن جاۋاپ الىنعان. بارلىق كۇدىكتىنىڭ وقيعا ورنىندا ايتقان جاۋاپتارى تەكسەرىلدى، پروتسەسس قاتىسۋشىلارى اراسىندا بەتتەستىرۋلەر وتكىزىلدى.

- قىلمىسقا قاتىسۋشىلاردىڭ بارلىعىنا قۇقىقتىق باعا بەرە وتىرىپ، 8 بەينەماتەريال زەرتتەلدى. قىلمىستىق ءىس 62 تومنان تۇرادى، ونىڭ ىشىندە بارلىق جينالعان دالەلدەمە، ساراپتاما قورىتىندىسى، جاۋاپ الۋ حاتتاماسى جانە باسقا دا ماڭىزدى ماتەريالدار بار، - دەپ حابارلادى دەپارتامەنتتەن.

وبلىستىق پوليتسيا تەرگەۋدىڭ بارىسى جانە پروتسەسس قاتىسۋشىلارىنىڭ كونستيتۋتسيالىق قۇقىقتارىنىڭ ساقتالۋى پروكۋراتۋرا ورگاندارىنىڭ باقىلاۋىندا بولعانىن اتاپ ءوتتى.

ەسكە سالايىق، بىلتىر 4-قازان كۇنى توبەلەستەن 16 جاسار جاس ءوسپىرىم قايتىس بولعانىن جازعانبىز.

كەيىن اشۋلى تالعارلىقتار جاس ءوسپىرىم ولىمىنە بايلانىستى نارازىلىققا شىقتى.

2024 -جىلدىڭ 12-قازانىندا قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

15-قازان كۇنى تالعار قالاسىنىڭ اكىمى باحىت قۋاتبەك ۇلى كۇرىشبەكوۆ، تالعار قالاسى اكىمىنىڭ ورىنباسارى ماتان ساعىندىق ءوز مىندەتتەرىن ءتيىستى دەڭگەيدە اتقارماعانى ءۇشىن لاۋازىمدارىنان بوساتىلدى. ارتىنشا، تالعار اۋدانى اكىمى اپپاراتىنىڭ باسشىسى اسلان قاسىمبايەۆ قىزمەتىنەن قۋىلدى.

2024 -جىلدىڭ جەلتوقسان ايىندا تالعار ماڭىندا شەرزات پولاتتىڭ اعاسى ءولى تابىلدى.