12:40, 09 - ماۋسىم 2020 | GMT +5
الماتىدان سەۋلگە جولعا شىققان 61 جولاۋشى رەيستەن ءتۇسىرىلدى
الماتى. قازاقپارات - «الماتى - سەۋل» رەيسىنىڭ كەي جولاۋشىلارىنا رەيسكە وتىرۋعا رۇقسات بەرىلمەدى، دەپ حابارلايدى قازاقپارات ءتىلشىسى.
Air Astana اۋە كومپانياسىنىڭ اقپاراتىنا سايكەس، 8 -ماۋسىمدا «الماتى- سەۋل» رەيسىنىڭ 61 جولاۋشىسىن شەكارا قىزمەتى رەيسكە جىبەرمەدى. جولاۋشىلاردىڭ كوپشىلىگى ءتولقۇجات باقىلاۋىنان وتە المادى.
«2020 -جىلدىڭ 11-مامىرىنداعى ق ر مەملەكەتتىك شەكاراسىن كەسىپ ءوتۋ تارتىبىنە سايكەس شەتەلگە شىعۋعا يمميگراتسيالىق ۆيزاسى بار جولاۋشىلار عانا رۇقسات الا الادى. ولار ەمدەلۋ ماقساتىندا شىعۋى مۇمكىن. سونىمەن قاتار، F5 تيپىندەگى سول جاقتا تۇپكىلىكتى تۇرۋعا رۇقسات بەرەتىن ۆيزاسى بارلار عانا شەتەلگە شىعا الادى» دەلىنگەن حابارلامادا.
61 جولاۋشى ناقتى وسى تيپتەگى ۆيزاسى بولماعاندىقتان شەتەلگە شىعا الماعان.
