نۇر-سۇلتاندا ەكسپرەسس تەستىلەۋدەن وتكەن 61 ادام اۋرۋحاناعا جاتقىزىلدى

بۇل تۋرالى ەلوردانىڭ قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ايتىپ بەردى، دەپ حابارلايدى قازاقپارات ءتىلشىسى.

«9-13-ءساۋىر ارالىعىندا نۇر-سۇلتان قالاسىندا 4766 ادامعا كوروناۆيرۋس ينفەكسياسىنا بايلانىستى ەكسپرەسس تەستىلەۋ جۇرگىزىلدى. ونىڭ 61 جاعدايىندا نەمەسە %1,2 تەستىلەۋ وڭ ناتيجە كورسەتتى»، - دەپ اتاپ ءوتتى باسقارما باسشىسى «حابار 24» تەلەارناسىنداعى بريفينگتە.

باس مەملەكەتتىك سانيتارلىق دارىگەردىڭ قاۋلىسىنا سايكەس، بۇل ادامدار ءارى قارايعى تەكسەرۋ جۇمىستارى ءۇشىن پروۆيزورلىق ستاتسيونارعا جاتقىزىلدى.

«ياعني، پوليمەرازدى-تىزبەكتى رەاكسيا ادىسىمەن كوروناۆيرۋس ينفەكسياسىنا تەكسەرۋ جۇرگىزىلەدى. 61 ادامنىڭ 30-ى تەرىس ناتيجەمەن اۋرۋحانادان شىعارىلدى»، - دەدى س. قيسىقوۆا.

بۇعان دەيىن باسقارما باسشىسى نۇر-سۇلتاندا كوروناۆيرۋس ينفەكسياسىنان قايتىس بولعان ادام تۋرالى ايتىپ بەرگەن ەدى. قازىرگى ۋاقىتتا ەلوردادا جۇقتىرعاندار سانى 264 ادامعا جەتتى. سوڭعى ەكى كۇندە - 12-13-ءساۋىر كۇندەرى 29 جاعداي تىركەلدى.

اۆتور: ايجان سەرىكجان قىزى