سولتۇستىك قازاقستاندا 61 مىڭ ادامعا تۇماۋعا قارسى ۆاكسينا ەگىلدى
س ق و تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسپا ءسوز قىزمەتىنىڭ مالىمەتىنە قاراعاندا، بيىل وتكەن جىلدىڭ وسى كەزەڭىمەن سالىستىرعاندا اۋرۋدى جۇقتىرۋ %19 تومەن بولعانىمەن، وتكەن اپتاداعى كورسەتكىشتەن %7 ارتقان. ياعني كۇننىڭ سۋىتۋىمەن سۋىق تيگەندەر سانى ارتىپ كەلەدى. اۋرۋدى جۇقتىرعانداردىڭ نەگىزگى ۇلەسىن - %72 ىن 14 جاسقا دەيىنگى بالالار قۇرايدى.
ۆيرۋسولوگيالىق زەرتتەۋلەردىڭ ناتيجەلەرى بويىنشا پەتروپاۆل قالاسىندا تۇماۋمەن اۋىرۋدىڭ ءبىر جاعدايى انىقتالدى. سىرقاتتان «ۆ» ءتيپتى تۇماۋ ۆيرۋسى تابىلدى.
«1 -قازاننان 1 -جەلتوقسانعا دەيىن وبلىستا تۇماۋعا قارسى ۆاكتسينا ەگۋ جۇمىستارى جۇرگىزىلدى. ۆاكسيناتسيا تۇماۋدىڭ سالدارىنان بولاتىن اۋىر اسقىنۋلارعا جول بەرمەيدى. 1 -قازاننان 15 -قاراشاعا دەيىن وبلىس تۇرعىندارىنىڭ %10,9، 60 مىڭ 965 ادام تۇماۋعا قارسى ەگىلدى، ونىڭ 17 مىڭ 408 بالا. جەرگىلىكتى بيۋدجەت ەسەبىنەن 60 مىڭ ادام ەگىلسە، قالعانى ەكپەنى اقىلى نەگىزدە الدى»، - دەيدى س ق و تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسپا ءسوز حاتشىسى ايناش ساعىندىقوۆا.
تۇماۋ ۆيرۋسى اۋرۋ ادامنان جوتەل جانە تۇشكىرگەندە اۋا- تامشى جولىمەن، سونداي-اق جالپى پايدالانۋ زاتتارى ارقىلى جۇعادى. ادەتتە جەدەل رەسپيراتورلىق ۆيرۋستىق ينفەكسيا ادامدا جەڭىل وتەدى، ال تۇماۋدا دەنە قىزۋى بىردەن 39-40°س دەيىن كوتەرىلىپ، قالتىرايدى، جوتەل پايدا بولىپ، السىزدىك، باس اۋىرۋى، بۇلشىق ەت پەن بۋىنداردىڭ اۋىرۋى مازالايدى.
سۋىق تيۋ مەن تۇماۋدان قورعانۋ ءۇشىن ماماندار قولدى ۇنەمى سابىنمەن جۋىپ، بولمەنى جەلدەتىپ وتىرۋ قاجەتتىگىن جانە سالاماتتى ءومىر سالتىن ۇستانىپ، سپورتپەن شۇعىلدانۋ كەرەكتىگىن ايتادى. سونداي-اق دارىگەرلەر اۋرۋدىڭ العاشقى بەلگىلەرى پايدا بولعان كەزدە ۋاقىتىلى مەديتسينالىق كومەككە جۇگىنۋدى جانە ءوزىن-ءوزى ەمدەۋگە بولمايتىندىعىن ەسكەرتەدى.
اۆتور: اقەركە داۋرەنبەك قىزى
