بوزىمبايەۆ تالدىقورعاندا 60 وتباسىنا ءوزى سالدىرعان ءۇيدى تەگىن سىيلادى
الماتى وبلىسىنىڭ ەكس-اكىمى قانات بوزىمبايەۆ ورازا كەزىندە تالدىقورعانعا بارىپ، ءوزى سالدىرعان كوپقاباتتى 60 پاتەرلىك ءۇيدى 60 وتباسىنا تەگىن سىيلاعان. بۇل تۋرالى بەلگىلى جۋرناليست كوسەمالى ءساتتىباي ۇلى ءوزىنىڭ Facebook-تەگى پاراقشاسىنا جازدى.
بۇل - ءبىزدىڭ ەلىمىزدە ۇلكەن جۇرەكتى ازاماتتىڭ قولىنان عانا كەلەتىن ءىس. ايتپەسە، استانا مەن الماتىدا، اتىراۋ مەن اقتوبەدە، تالدىقورعان مەن تارازدا قانشاما ميللياردەرلەر مەن ميلليونەرلەر ءجۇر، جاعادايى جوق جاندارعا وسىلاي توپتاپ تۇرىپ پاتەر سىيلاسا؟ - دەپ ماقتادى ارىپتەسىمىز ەكس-اكىمدى.
ونىڭ ايتۋىنشا، قانات بوزىمبايەۆ جامبىل وبلىسىندا اكىم بولىپ تۇرعان كەزدە دە كوپتەگەن يگىلىكتى ىستەر اتقارعان كورىنەدى.
تاراز قالاسىنا الماتى جاقتان كەلەتىن جولىمىز كەڭەس وكىمەتى كەزىندە سالىنعاندىقتان، بۇگىنگى كۇن تالابىنا ساي كەلمەيتىن وتە تار ەدى. سونى ەكى باعىتتا جۇرەتىن ەتىپ، كەڭەيتتى. ورتاسىنا قىلقان جاپىراقتى تالدار ەكتىردى. ونىمەن قويا سالماي، سول ەكى باعىتتا جۇرەتىن كەڭ جولعا تاراز قالاسىنا كىرەتىن شىعىس قاقپاسىن سالدىردى. ول قاقپا قازىر تاراز قالاسىنىڭ ماقتانىشىنا اينالدى، - دەيدى كوسەمالى ءساتتىباي ۇلى.
سونداي-اق ول حيباتۋللا ات-تارازي مەشىتىنىڭ قاسبەتى مەن مۇنارالارىن ۇلتتىق ويۋ-ورنەكپەن قايتا جاڭارتىپ، «تاراز-ارەنا» سپورت كەشەنىن سالدىرعان.
