فرانسيا 60 جىلدا بولماعان قۋاڭشىلىقتان زارداپ شەگىپ وتىر

پاريج. قازاقپارات - فرانسيادا كەيىنگى 60 جىلدا بولماعان قۇرعاق قىستان كەيىن قۋاڭشىلىق باستالدى، دەپ حابارلايدى قازاقپارات France 24-كە سىلتەمە جاساپ.

مەتەورولوگتار ەلدە 32 كۇننەن بەرى جاۋىن-شاشىن بولماعانىن ايتىپ، دابىل قاعۋدا.

Meteo France اگەنتتىگى مالىمەتىنشە، ادەتتە قىستاعى جاۋىن-شاشىن ەسەبىنەن جەراستى سۋلارى تولىعادى.

حابارلانعانداي، مۇنداي قۇرعاقشىلىق پەن جاۋىن-شاشىننىڭ بولماۋى سوڭعى رەت فرانسيا رەسپۋبليكاسىندا 1959-جىلى، ياعني 64 جىل بۇرىن تىركەلگەن. سونداي-اق 2022-جىل فرانسيا ءۇشىن ەڭ ىستىق كەزەڭ بولعانى اتاپ وتىلۋدە.

Meteo France اگەنتتىگى فرانسيانىڭ وڭتۇستىگىنە جاقىن كۇندەرى جاۋىن جاۋاتىنىن جانە الداعى ءۇش اي ەل ءۇشىن شەشۋشى مەزگىل بولاتىنىن مالىمدەدى.

ايتا كەتەيىك، فرانسيا مۇنداي ماسەلەگە تاپ بولعان ەۋروپاداعى جالعىز ەل ەمەس.

ەۋرووداق كليماتولوگتارىنىڭ ايتۋىنشا، وتكەن اي ەۋروپا تاريحىندا تىركەلگەن ءۇشىنشى ەڭ جىلى قاڭتار بولعان. ال جاڭا جىل كۇنگى اۋا رايى كونتينەنتتىڭ كەي بولىگىندە رەكوردتى كورسەتكىشكە جەتتى.

قۇرعاقشىلىق سالدارىنان ەگىن قۋراپ، ورماندار ورتەنىپ، كونتينەنتتىڭ ەنەرگوجۇيەسى مەن سۋ قورىنا اۋىرتپالىق ءتۇسىپ جاتىر.

كەيىنگى ۇلتتىق گيدرولوگيالىق زەرتتەۋ بويىنشا، قۋاڭشىلىققا تاپ بولعان ەۋروپا ەلدەرىنىڭ ءبىرى يسپانيادا سۋ قورى كەيىنگى ون جىلداعى 60,8 پايىز كورسەتكىشتەن ورتاشا 50,7 پايىزعا دەيىن تومەندەدى.

بۇعان دەيىن يتاليا دا قۇرعاقشىلىقتان زارداپ شەگىپ وتىرعانى حابارلانعان. قۇرعاق قىس سالدارىنان ۆەنەتسيانىڭ كەيبىر كانالدارى كەۋىپ كەتكەن.