الماتى اۋىر ماشينا جاساۋ زاۋىتىن قالا سىرتىنا كوشىرۋ ءۇشىن 60 ميلليارد تەڭگە قاجەت - ەربولات دوسايەۆ
المالى اۋدانىنىڭ تۇرعىنى 600 وتباسىنىڭ اتىنان اكىمگە جۇگىندى. ونىڭ ايتۋىنشا، ولاردىڭ تۇرعىن ءۇي كەشەنى تولە ءبي-جاروكوۆ مەكەنجايى بويىنشا الماتى اۋىر ماشينا جاساۋ زاۋىتىنىڭ (ا ز ت م) جانىندا ورنالاسقان.
«ءبىز جاڭا ۇيگە 2021-جىلى كىردىك. قازىر تۇرعىندار كۇردەلى ماسەلەگە تاپ بولىپ وتىر. ءبىزدىڭ ءۇيدىڭ جانىندا ورنالاسقان اۋىر ماشينا جاساۋ زاۋىتى اۋاعا زياندى زاتتار شىعارادى، قاتتى شۋ ەستىلەدى. ەكولوگيا باسقارماسى مەن قالالىق سانيتاريالىق-ەپيدەميولوگيالىق باقىلاۋ دەپارتامەنتىنە جۇگىندىك، الايدا ءالى كۇنگە دەيىن ماردىمدى جاۋاپ المادىق. ال زاۋىت وكىلدەرى بولسا، بىزگە بۇل اۋماقتا شىعارىندىلاردى شىعاراتىن ونەركاسىپتىك كاسىپورىنداردىڭ كوپ ەكەنىن ايتتى. بۇدان ءبىزدىڭ بالالارىمىز بەن دەنساۋلىعىمىز زارداپ شەگەدى. بۇل زاۋىت قالانىڭ سىرتىنا شىعارىلا ما؟» - دەپ سۇرادى الماتىلىق ايەل المالى اۋدانى تۇرعىندارىمەن كەزدەسۋگە كەلگەن اكىمنەن.
ءوز كەزەگىندە ەربولات دوسايەۆ الماتى اۋىر ماشينا جاساۋ زاۋىتىن باسقا جەرگە كوشىرۋگە تىرىسامىن دەپ جاۋاپ بەردى.
«اتالعان زاۋىتقا قاتىستى بىزدە يدەيا بار. كوشىرۋگە تىرىسامىز. زاۋىتتا بۇگىندە 350 گە جۋىق ادام جۇمىس ىستەيدى. قالادا ەكىنشى جوبامىز دا بار - كيروۆ اتىنداعى زاۋىت. ولاردى قايتا قۇرۋدى بولجاپ وتىرمىز، ءبىراق ماسەلە قارجىسىندا بولىپ تۇر. زاۋىتتى كوشىرۋدىڭ ناقتى مەرزىمىن ايتا المايمىن. ويتكەنى، وعان شامامەن 40 تان 60 ميلليارد تەڭگەگە دەيىن قاراجات قاجەت»، - دەدى اكىم.
ال، اكىمنىڭ ورىنباسارى الىشەر ءابدىقادىروۆ قازىر كوشىرۋ جۇمىستارى ءجۇرىپ جاتقانىن ايتتى. ونىڭ سوزىنشە، بارلىق ءىرى ونەركاسىپتىك كاسىپورىندار قالانىڭ شەتىنە كوشىرىلەدى. بۇل الەمدىك تاجىريبە.
ايتا كەتەيىك، «الماتى اۋىر ماشينا جاساۋ زاۋىتى» 1941-جىلى نەگىزى قالانعان ءىرى كاسىپورىن. العاشىندا سوعىسقا قاجەتتى ءونىم شىعارعان ءوندىرىس 1946-جىلدان باستاپ بەيبىت ماقساتتاعى ميسسياعا كوشكەن. سول جىلداردان باستاپ مەتاللۋرگياعا قاجەتتى قۇرال-جابدىق ءوندىرىسى جولعا قويىلىپ كەلەدى.
