قازاقستاندىقتاردى 60 ميلليون تەڭگەگە الداپ كەتكەن الاياق دۋبايدا ۇستالدى
بۇل تۋرالى ىشكى ىستەر مينيسترلىگىندە ونلاين وتكەن باسپا ءسوز ءماسليحاتى بارىسىندا بەلگىلى بولدى، دەپ حابارلايدى قازاقپارات ءتىلشىسى.
«ب ا ءا - دەن قازاقستاندىق كاسىپورىنداردى 60 ميلليون تەڭگەدەن استام سوماعا الداپ كەتكەن الاياق قايتارىلدى. ىشكى ىستەر مينيسترلىگى ينتەرپولدىڭ ۇلتتىق ورتالىق بيۋروسى دۋباي قالاسىنداعى ق ر باس كونسۋلدىعىمەن جانە قارجى مونيتورينگى اگەنتتىگىمەن ءوزارا ءىس-قيمىل كەزىندە ب ا ءا- دەن قازاقستانعا 2015 -جىلدان بەرى اسا ءىرى مولشەردە الاياقتىق جاساعانى ءۇشىن ىزدەستىرىلىپ جاتقان 43 جاستاعى قىلمىسكەر تولەگەن راميەۆ قايتارىلدى»، - دەدى ق ر ءى ءى م وكىلى شۇعىلا تۇرلىبەك.
مينيسترلىك وكىلىنىڭ مالىمدەۋىنشە، قازىرگى ۋاقىتتا ايىپتى قاماۋعا الىندى.
«سوڭعى 3 ايدا ينتەرپولدىڭ جۇمىسىنىڭ ناتيجەسىندە يسپانيا، رەسەي، باحرەين، ب ا ءا، گرۋزيا، ۆەنگريا جانە تاعى باسقا ەلدەر اۋماعىنان ءتۇرلى قىلمىستار ءۇشىن ىزدەستىرىلىپ جاتقان 16 ادام انىقتالدى. مىسالى، قاڭتار ايىندا ۆەنگريادا حاكەرلىك ارەكەتتەر ارقىلى اقشا ۇرلاعانى ءۇشىن الماتى قالاسىنىڭ پوليتسيا دەپارتامەنتى ىزدەستىرىپ جاتقان رۋمىنيا ازاماتى ۇستالدى. ول ترانسۇلتتىق ۇيىمداسقان قىلمىستىق توپتىڭ قۇرامىندا قازاقستان، رەسەي، قىتاي، ۋكراينا، ازەربايجان بانكتەرىنىڭ شوتتارىنا حاكەرلىك شابۋىل جاساپ، اقشا جىمقىرعان. شىعىن سوماسى 9 ميلليون ا ق ش دوللارىن قۇرايدى. بۇگىندە ايىپتىنى ەلىمىزگە بەرۋ ماسەلەسى قارالىپ جاتىر»، - دەيدى ول.
