قازاق كونسەرتتىڭ 60-مەرەيتويلىق ماۋسىمى بولدى - فوتو
تۇتاس ماۋسىمدى قورىتىندىلاعان گالا-كونسەرتتە ايمان مۇساحوجايەۆا، ازامات جىلتىركوزوۆ، مەدەت شوتابايەۆ، ەرلان رىسقالي، سالتانات احمەتوۆا، ءالفيا كارىموۆا، ايزادا قاپونوۆا سىندى تانىمال سوليستەر ونەر كورسەتتى. سونداي-اق ونەرسۇيەر قاۋىم قازاق مەملەكەتتىك سيمفونيالىق وركەسترىنىڭ ورىنداۋىندا ۇزدىك شەدەۆرلەردى تىڭداي الدى. وندا ۋكرايناداعى دنەپروپەتورۆسك فيلورمونياسىنىڭ كوركەمدىك جەتەكشىسى ايدار تورىبايەۆ ديريجەرلىك ەتتى.
كونسەرتتىك باعدارلاماعا «قىز جىبەك»، «ەڭلىك- كەبەك»، «كارمەن»، «سيەۆيلسكي سيريۋلنيك»، «يروديادا» جانە باسقا دا وپەرالاردىڭ اريالارى ەنگەن. سونىمەن بىرگە كونسەرتتە ە. حاسانعالييەۆ، س. ەركىمبەكوۆ، دج. روسسيني، ي. گايدن جانە ۆ. ا. موتسارت، ل. بەرنستاين، ل. حاميدي سىندى بەلگىلى كومپوزيتورلارىنىڭ تۋىندىلارى شىرقالدى.
«بۇل ماۋسىمدا جۇرتشىلىققا ۇسىنعان جاڭالىق از بولعان جوق. الپىستىڭ اسۋىن باعىندىرىپ، يگى ءداستۇر مەن جاڭاشىلدىقتى قاتار ۇشتاستىرا بىلگەن قازاق كونسەرتتىڭ بارلىق جوبالارى بيىل دا حالىقتى رۋحاني سۋسىنداتىپ، بارشاعا قولجەتىمدى بولدى. مەرەيتويلىق جىل اياسىندا ارتىستەرىمىز كورەرمەندەردى ونلاين جانە وفلاين فورماتتاعى ءىس- شارالارمەن قۋانتتى. اتاپ ايتقاندا، 50-گە جۋىق وفلاين جانە 100-گە تارتا ونلاين فورماتتا جاڭا جوبالاردى ۇسىندى. ونىڭ ىشىندە قايىرىمدىلىق شارالار، اشىق اسپان استىنداعى قويىلىمدار مەن كونسەرتتەر بار. بيىل قازاق كونسەرتتىڭ شىعارماشىلىق الەۋەتى جاڭا باعىتتا دامي ءتۇسىپ، ۇيىمنىڭ الەۋمەتتىك ماڭىزى دا ارتا ءتۇستى. ەندى ءدال وسى قارقىنمەن جاڭا كونسەرتتىك ماۋسىمعا دايىندىق جۇرگىزەمىز»، - دەيدى كونسەرتتىك ۇيىمنىڭ باسشىسى جەڭىس سەيدۋللا ۇلى.
ايتا كەتەيىك، كونسەرتتە كوروناۆيرۋس پاندەمياسىنا بايلانىستى بارلىق سانيتارلىق تالاپتار مەن ەرەجەلەر ساقتالدى.
اۆتور: ايجان سەرىكجان قىزى
