امەريكالىق ۆاكسيناسى ءتيىمدى، ءبىراق وڭتۇستىك افريكا مۋتاتسياسىنان 60 پايىز عانا قورعاي الادى
كومپانيا 28 - قاڭتاردا تاراتقان حابارلاماسىندا «Covid-كە قارسى ازىرلەگەن ۆاكسينا ۆيرۋس مۋتاتسياسىنا قارسى تۇرا الادى» دەپ مالىمدەگەنمەن «ۆاكسينانىڭ وڭتۇستىك افريكادان تاراپ جاتقان مۋتاتسياسىنان قورعاۋ دارەجەسى ەداۋىر تومەن» دەدى.
دەنساۋلىق ساقتاۋ سالاسىنىڭ ماماندارى كوروناۆيرۋسقا قارسى ۆاكسينالار العاش ۇلى بريتانيا، برازيليا جانە وڭتۇستىك افريكادا انىقتالعان ۆيرۋستىڭ وزگەرگەن تۇرىنە قاجەتتى دارەجەدە توتەپ بەرە الا ما دەگەن ماسەلەگە الاڭداپ وتىرعان شاقتا كومپانيا مالىمدەمە تاراتتى.
وسى اپتا باسىندا Moderna جانە Pfizer/BioNTech كومپانيالارى وزدەرى ازىرلەگەن ۆاكسينانىڭ بريتاندىق شتامعا توتەپ بەرە الاتىنىن، ءبىراق وڭتۇستىك افريكاداعى مۋتاتسيادان قورعاۋعا كۇشى تولىق جەتپەيتىنىن مالىمدەگەن.
Novavax كومپانياسىنىڭ ايتۋىنشا، ۇلى بريتانيادا 15 مىڭ ادام اراسىندا جۇرگىزىلگەن سىناق Novavax ۆاكسيناسىنىڭ 89,3 پايىز ءتيىمدى ەكەنىن كورسەتكەن. بۇل تيىمدىلىگى 95 پايىز دەلىنگەن Pfizer/BioNTech جانە Moderna ۆاكسينالارىنىڭ كورسەتكىشتەرىنە جاقىن.
سىناق ۇلى بريتانيا ۆيرۋستىڭ جىلدامىراق تارايتىن تۇرىنە كەزىگىپ، ناۋقاستار كۇرت كوبەيگەن شاقتا جۇرگىزىلگەن. ال وڭتۇستىك افريكادا جۇرگىزىلگەن ەكىنشى كەزەڭدەگى سىناق Novavax ۆاكسيناسىنىڭ ۆ ي چ جۇقپاعان ادامداردى كوروناۆيرۋستان 60 پايىز عانا قورعاي الاتىنىن كورسەتكەن.
https://www.azattyq.org