ءۇش ءجۇز كۇندە 60 ەل: ءۇندىستاندىق ساياحاتشىلار اۆتوستوپپەن قازاقستانعا جەتتى

300 كۇندە 70 مىڭ شاقىرىمدى ەڭسەرۋگە بەل بۋعان ساياحاتشىلار بۇگىن ات باسىن قازاقستانعا تىرەدى، دەپ حابارلايدى قازاقپارات ءتىلشىسى.

«بۇل ءبىزدىڭ قازاقستانعا العاش كەلۋىمىز. ماقساتىمىز - الەمنىڭ 60 ەلىن اۆتوستوپپەن ارالاۋ. ساياحاتىمىز ءوز وتانىمىز - ءۇندىستاننان باستالىپ، وڭتۇستىك ازيا، قىتاي جانە ورتالىق ازياعا جالعاستى. قازاقستاننان سوڭ رەسەيگە، ودان ءارى ەۋروپاعا بارامىز. سوڭعى ايالدامامىز لاتىن امەريكاسى مەن اقش بولماق. شىنىن ايتقاندا، ءبىز ورتالىق ازيا ەلدەرى تۋرالى كوپ بىلە بەرمەيمىز. قازاقستان ءوز كەزەگىندە ءبىزدى تاڭعالدىردى. وتە ادەمى جانە كەڭ جازيرالى ەل. سىزدەردىڭ دالالىق جازىقتارىڭىزدى سوزبەن جەتكىزۋ مۇمكىن ەمەس. ادامدار دا قاراپايىم جانە قوناقجاي. ءبىزدى تانىمايتىن ادامدار جىلى شىرايمەن قارسى الدى. ساياحاتىمىزدىڭ ەڭ ۇزاق ۋاقىتى قازاقستاندا ءوتتى»، - دەپ ءوز اسەرىمەن ءبولىستى پراۆين مەحتا.

ونىڭ ايتۋىنشا، ساياحات بيىلعى جىلدىڭ ءساۋىر ايىندا باستالدى. قازاقستان تىزىمدەگى توعىزىنشى ەل. قىرعىزستاننان كەيىن تارازعا، الماتىعا، ەندى نۇر-سۇلتان قالاسىنا تابان تىرەدى.

«بۇگىن ساياحاتىمىزدىڭ 75- كۇنى. سىزدەردىڭ ەلدەرىڭىز 9- ەل بولىپ وتىر. الدا ءالى 51 ەلدى ارالاۋىمىز كەرەك، جالپى 300 كۇننىڭ ىشىندە 60 ەلدى ارالايمىز دەپ جوسپار قۇردىق. ساياحاتىمىزدىڭ سوڭعى نۇكتەسى برازيليا دەپ جوبالاپ وتىرمىز. ءبىز بۇنى بەلسەندى ساياحات دەپ سانايمىز. جانە ءار ەل ءۇشىن ارنايى باعدارلامامىز بار. بولعان جەرىمىزدە جەرگىلىكتى ادامدارمەن، ەلشىلىك جانە جۋرناليستەرمەن اڭگىمەلەسىپ، ءوز اسەرىمىزبەن بولىسەمىز. ماقساتىمىز - ساياحات ارقىلى ادامداردى شابىتتاندىرۋ»، - دەيدى ول.

ساياحاتشىلار ەلوردادا 3 كۇنگە توقتاعان جانە ولاردىڭ ناقتى جوسپارى بار. ونىڭ ىشىندە قازاقستانداعى ءۇندىستاننىڭ ەلشىسىمەن، استانالىق سۋرەتشىلەرمەن كەزدەسۋ جانە نازاربايەۆ ۋنيۆەرسيتەتىنىڭ ستۋدەنتتەرىمەن اڭگىمە- دۇكەن قۇرۋ.

«ماعان الماتى قاتتى ۇنادى. كەرەمەت قالا. نەسىمەن ۇنادى دەسەڭىز؟! ءدامحانادا وتىرعانىمىزدا ادامدار بىزگە تۇسىنىستىكپەن قاراپ، ءجون سىلتەپ، قۇرمەت كورسەتتى»، - دەدى پ. مەحتا.

ءۇندىستاندىق مەيمانداردىڭ سوزىنە سەنسەك، بەلسەندى ساياحاتتى ولار وسىدان 10 جىل بۇرىن باستاعان. ياعني، العاش ءوز ەلدەرىنەن باستاپ، كەيىن ساياحات گەوگرافياسى كەڭەيە بەرگەن.

«ۇزاق جولدان شارشامايسىزدار ما؟» دەگەن سۇراققا: «ءيا، ءوز ءۇيىمىزدى ساعىنامىز. ارينە، ساياحاتتاۋ بارىسىندا دەمالۋدى دا ۇمىتپايمىز. دەگەنمەن، بۇل ساۋىق قۇرۋدىڭ ەرەكشە ءتۇرى»، - دەپ جاۋاپ بەردى.

سونداي-اق، تۋريستەر رەسەيدەن سوڭ ەۋروپا ەلدەرىنە جول تارتاتىنىن، جالپى العاندا 300 كۇننىڭ ىشىندە 70 مىڭ شاقىرىمدى ءجۇرىپ وتەتىندىكتەرىن جەتكىزدى.

«اۆتوستوپ ساياحاتىمىزعا قولداۋ كورسەتۋشىلەر ءارتۇرلى ادامدار. مىسالى، اۆتوكومپانيا بىزگە وزدەرىنىڭ دەمو-اۆتوكولىكتەرىن ۇسىندى، سونداي-اق «Rotary International» قايىرىمدىلىق ۇيىمى ءتۇرلى ۇيىم وكىلدەرىمەن كەزدەسۋ ۇيىمداستىرۋدا قولداۋلارىن كورسەتتى. ياعني، قولداۋ ءبىلدىرۋ دەگەنىمىز تەك قانا قارجىلاي كومەك كورسەتۋ دەگەن ءسوز ەمەس. ءبىز قىتاي، بانگلادەشكە بارعاندا تىلدەرىن تۇسىنبەدىك، ولار دا ءبىزدىڭ ءتىلدى تۇسىنبەدى. ءبىراق ىم- شارا ارقىلى ءبىر-ءبىرىمىزدى ۇعىندىق. ءبىز ۆەگەتارياندارمىز، ءار ەلگە بارعاندا ىم-شارامەن بولسا دا تۇسىندىرۋگە تىرىسامىز»، - دەدى پراۆين مەحتا.

سونىمەن قاتار، جولاۋشىلار وزدەرى ساياحاتتاعان كوپ ەلدەردە جول ساپاسىنىڭ جاقسى دەڭگەيدە ەكەنىن جانە ءۇندىستاندا جول ساپاسى پروبلەماسىنىڭ بارىن اتتى.

«ساياحاتىمىزدىڭ بولاشاق جوسپارىندا افريكا ەلدەرى بار. ءبىزدىڭ باستى ماقسات - ءتۇرلى ۇلت وكىلدەرىمەن كەزدەسىپ، ولاردىڭ مادەنيەتى مەن ءداستۇرىن تانىپ، ءبىلۋ. جانە ءوزىمىز تۋرالى ايتا وتىرىپ، ولاردىڭ سۇراقتارىنا جاۋاپ بەرۋ»، - دەدى ول.