جولعا شىققان «دەنساۋلىق» پويىزى 60 مىڭعا جۋىق ادامعا قىزمەت كورسەتپەك
پويىز قازاقستاننىڭ شالعاي بەكەتتەرىنىڭ تۇرعىندارىنا تەگىن مەديتسينالىق كومەك كورسەتەدى، دەپ حابارلايدى قازاقپارات ءتىلشىسى.
«قازىرگى كۇنى قازاقستاننىڭ شالعاي اۋداندارىنىڭ تۇرعىندارى ساپالى، ۋاقىتىلى جانە تەگىن مەديتسينالىق كومەككە ءالى دە تولىعىمەن قول جەتكىزگەن جوق. وسى تۇرعىدا «دەنساۋلىق» جوباسى تۇرعىندارعا ساپالى جانە جەدەل دياگنوستيكا جاساۋعا مۇمكىندىك بەرەتىن زاماناۋي قۇرالدارمەن جابدىقتالعان مەديتسينالىق قىزمەتتى ۇسىنادى. جوبا اياسىندا ءاربىر ادام مەديتسينالىق كومەك الا الادى. پويىز بۇگىن الماتى قالاسىنان باستاۋ الىپ، وسى جىلدىڭ 21 جەلتوقسانىنا دەيىن جۇرەتىن بولادى. بيىلعى جىلى ءبىز باراتىن وبلىستاردىڭ سانىن ارتتىردىق، پويىز قازاقستاننىڭ بارلىق وڭىرلەرى بويىنشا 195 بەكەتتى ارالاپ شىعادى»، - دەدى «Samruk-Kazyna Trust» كورپوراتيۆتىك قورىنىڭ باس ديرەكتورى دياس ازبەرگەنوۆ باسپا ءسوز ءماسليحاتىندا.
ونىڭ ايتۋىنشا، باستاۋىن الماتى وبلىسىنان العان مەديتسينالىق پويىز ودان ءارى شىعىس قازاقستان، پاۆلودار، سولتۇستىك قازاقستان جانە اقمولا وبلىستارىنا باعىت الادى. سول سياقتى ورتالىق قازاقستان بەكەتتەرىنىڭ تۇرعىندارىنا قىزمەت كورسەتە وتىرىپ، پويىز باتىس وڭىرلەرگە العان باعىتى وڭتۇستىككە جالعاسادى دا، جامبىل وبلىسىندا ءوز باعدارىن اياقتايدى.
«جالپى جول ءجۇرىپ ءوتۋ قاشىقتىعى 19 مىڭنان استام شاقىرىمدى قۇرايدى جانە پويىز كەستەسى www.medpoezd.kz جانە www.sk-trust.kz/kz سايتتارىندا قول جەتىمدى.
مەديتسينالىق بريگادالاردىڭ قۇرامىندا قاجەتتى مامانداردىڭ ءبارى بار، ونىڭ ىشىندە تەراپيەۆت، ءتىس دارىگەرى، وكۋليست، ماممولوگ جانە باسقا. جالپى جوبا بارىسىندا 10 مەديتسينالىق بريگادا كەزەكپەن جۇمىس ىستەيدى»، - دەيدى ول.
قور دەرەگىنە سۇيەنسەك، وتكەن جىلى مەديتسينالىق پويىز قازاقستان بويىنشا 124 بەكەتتى ارالاپ، 42 مىڭنان استام (42306) ادامعا قىزمەت كورسەتتى.