قازاقستانداعى سۋ ايدىندارىنا 60 ميلليون شاباق جىبەرىلەدى
بۇل تۋرالى ق ر ا ش م ورمان شارۋاشىلىعى جانە جانۋارلار الەمى كوميتەتىنىڭ باسپا ءسوز حاتشىسى ساكەن دىلداحمەت ايتتى، دەپ حابارلايدى قازاقپارات ءتىلشىسى.
«بالىق رەسۋرستارىنىڭ ءوسىمىن مولايتۋ جونىندەگى 2018 -جىلعا ارنالعان مەملەكەتتىك تاپسىرىس شەڭبەرىندە الماتى، قىزىلوردا جانە سولتۇستىك قازاقستان وبلىستارىنىڭ سۋ ايدىندارىنا تۇقى جانە وسىمدىكجەمدى بالىقتاردىڭ (اق امۋر، ءدوڭماڭداي) شاباقتارىن جىبەرۋ جۇمىستارى باستالدى. 2018 -جىلعى 17-20 - قىركۇيەك ارالىعىندا «پەتروپاۆل بالىق پيتومنيگى» رمقك پەتروپاۆل جانە سەرگەيەۆ سۋ قويمالارىنا 731 250 دانا ءبىرجازعى تۇقى شاباعىن جىبەردى»، - دەپ جازدى ساكەن دىلداحمەت فەيسبۋكتەگى پاراقشاسىندا.
حابارلانىپ وتىرعانداي، 20 - قىركۇيەكتەن باستاپ «قامىستىباس بالىق پيتومنيگى» ر م ق ك مەن «قاپشاعاي ۋىلدىرىق شاشۋ- ءوسىرۋ شارۋاشىلىعى - 1973» ج ش س قىزىلوردا جانە الماتى وبلىسىنىڭ سۋ ايدىندارىنا بالىق جىبەرۋ جۇمىستارىن باستاپ كەتكەن.
«بالىقتاردى سۋ ايدىندارىنا جىبەرۋ جۇمىستارىن قابىلداۋ جەرگىلىكتى اتقارۋشى ورگانداردىڭ، وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسيالارىنىڭ جانە عىلىمي ۇيىمداردىڭ وكىلدەرىنەن قۇرالعان كوميسسيا ارقىلى جۇزەگە اسىرىلۋدا. مەملەكەتتىك تاپسىرىس شەڭبەرىندە 2018 -جىلى رەسپۋبليكانىڭ سۋ ايدىندارىنا 60 ميلليون دانا شاماسىندا قۇندى بالىق تۇرلەرىنىڭ شاباقتارىن جىبەرۋ جوسپارلانعان»، - دەلىنگەن حابارلامادا.
اۆتور: ايان بەكەن ۇلى
