ايتىسكەر اقىندار «جايىق ايتىسىنا - 60 جىل» توسبەلگىسىمەن ماراپاتتالدى
سونداي-اق ەكى كۇندىك شارا اياسىندا سۋىرىپ سالما ونەرىنىڭ مايتالماندارى «جايىق ايتىسىنا - 60 جىل» توسبەلگىسىمەن ماراپاتتالدى، دەپ حابارلايدى قازاقپارات ءتىلشىسى.
ب ق و حالىق شىعارماشىلىعى ورتالىعى ۇيىمداستىرعان اق جايىق ايتىسىنىڭ 60 جىلدىعىنا ارنالعان جىر دوداسىنا استانا قالاسىنان، ماڭعىستاۋ، اقتوبە، اتىراۋ، قىزىلوردا جانە باتىس قازاقستان وبلىستارىنان بارلىعى 20 اقىن قاتىسىپ، باق سىنادى.
سايىس قورىتىندىسىندا جانىبەك اۋدانى اتىنان شىققان مۇرادىم ميرلانوۆ باس جۇلدەنى (500 مىڭ تەڭگە) جەڭىپ الدى. بوكەيوردالىق جانسايا مۋسينا - ءبىرىنشى (350 مىڭ تەڭگە)، اقجايىقتىق مەيىرمان شاكەنوۆ پەن قىزىلوردالىق جىبەك شاحماردان قىزى ەكىنشى (200 مىڭ تەڭگە) ورىنعا يە بولدى. ورالدىق ورىنبەك مەڭدىقۇلوۆ پەن ماڭعىستاۋ وبلىسى جاڭاوزەن قالاسىنان كەلگەن ارعىنبەك قالبايەۆ ءۇشىنشى ورىندى ءبولىستى.
ەكى كۇنگە سوزىلعان شارا بارىسىندا وڭىردەگى ايتىس ونەرىنىڭ دامۋى مەن بولاشاعى تۋرالى «دوڭگەلەك ۇستەل» ۇيىمداستىرىلىپ، كەزىندە ايتىسقا قاتىسقان اقىندار «جايىق ايتىسىنا - 60 جىل» توسبەلگىسىمەن ماراپاتتالدى.
«بۇدان الپىس جىل بۇرىنعى مەن قازىرگى ايتىستىڭ اراسى، ارينە، جەر مەن كوكتەي. ايتىستىڭ دەڭگەيى جوعارىلاپ، شەتىنەن ايتقىش جاستار كوبەيدى. بۇل - قازاقتىڭ ايتىس سىندى ۇلتتىق ونەرىنىڭ ولمەيتىنىنىڭ جارقىن كورىنىسى»، - دەدى قازاقپارات تىلشىسىنە قازىلار القاسىنىڭ ءتوراعاسى، جاس كەزىندە ءوزى دە ايتىسقا قاتىسقان، قازىر الماتى قالاسىندا تۇراتىن جۋرناليستيكا سالاسىنىڭ ارداگەرى، قازاقستاننىڭ ەڭبەك سىڭىرگەن مادەنيەت قىزمەتكەرى عاريفوللا كوشەنوۆ.
