ءداستۇرلى ءانشى تاتيانا بۋرميستروۆا 60 جاستا
بۇگىن وسى مەرەكەلى داتاعا وراي وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ انشىمەن ارنايى كەزدەسىپ، مەرەيلى مەرەيتويىمەن قۇتتىقتادى.
ءداستۇرلى ءانشى ونەرگە سارپ ەتكەن 31 جىلىندا قازاق حالقىنىڭ ءتول تۋىندىلارى مەن تەرمەلەرىن ناقىشىنا كەلتىرە ورىنداپ قانا قويماي، ەل اراسىندا جوعارى دەڭگەيدە ناسيحاتتاپ كەلەدى.
«مەن ءسىزدىڭ قازاق انىنە، قازاقتىڭ ونەرىنە دەگەن قۇرمەتىڭىزگە ءتانتى بولامىن. ءسىز شىعارماشىلىق عۇمىرىڭىزدى حالىق قازىناسىن دارىپتەۋگە ارناعان جانسىز. ءسىزدىڭ بۇل قادامىڭىز كوپ ۇلتتى تاۋەلسىز ەلىمىز ءۇشىن وشپەس ونەگە، ۇلگى بولارلىق دۇنيە»، - دەدى جانسەيىت قانسەيىت ۇلى.
قازاقتىڭ ءان- تەرمەسىن 30 جىلدان اسا ۋاقىتتان بەرى دارىپتەپ ەلىنىڭ سۇيىسپەنشىلىگىنە بولەنىپ جۇرگەن ورىس قىزى تاتيانا بۋرميستروۆا بايدىبەك اۋدانىنداعى العاباس اۋىلىندا دۇنيەگە كەلگەن. ورىس وتباسىندا تۋىپ- وسكەن وعان قالىڭ قازاقتىڭ ىشىندە ءجۇرىپ، ءتىلدى مەڭگەرۋ قيىنعا سوقپاعان، سول سياقتى مۋزىكاعا دەگەن قىزىعۋشىلىق ونىڭ 7 جاسىنان دومبىرا ۇيرەنۋگە دەگەن ىقىلاسىن وياتقان.
الماتىداعى مەديتسينا ينستيتۋتىندا وقىپ جۇرگەندە رەسپۋبليكالىق «التىباقان»، «تاماشا» سياقتى تەلەحابارلارعا ءتۇسىپ، ءانشى رەتىندە ەلگە كەڭىنەن تانىلا باستادى. ءوز كەزەگىندە ءسوز العان تاتيانا بۋرميستروۆا شىعارماشىلىعىنا ەرەكشە باعا بەرگەن ءوڭىر باسشىسىنا العىسىن جاۋدىرىپ، الداعى جوسپارلارىمەن ءبولىستى.
«بۇگىن وبلىستىق ورىس دراما تەاترىندا «ايەلدىڭ جاسى 18...» اتتى شىعارماشىلىق كەشىمدى بەرگەلى وتىرمىن. مەنىڭ بۇل قادامىمدى تۋىپ، وسكەن جەرىمە، تۋعان توپىراعىما، كيەلى وڭتۇستىگىمە ەسەپ بەرۋ دەپ قابىلداعان ءجون. ەلباسىمىزدىڭ «بولاشاققا باعدار: رۋحاني جاڭعىرۋ» ماقالاسىندا ايتىلعان قازاق حالقىنىڭ كودى مەنىڭ ويىمشا وسى قازاقى داستۇرىندە، قازاقى اندەرىندە دەپ تۇسىنەمىن»، - دەدى ءداستۇرلى ءانشى.
بۇگىن وبلىستىق ورىس دراما تەاترىندا ءداستۇرلى ءانشىنىڭ «ايەلدىڭ جاسى 18...» اتتى شىعارماشىلىق كەشى كەشى وتەدى. تەاتر فويەسىندە «قياعا قانات قاقتى قانشا ارمانىم!» اتتى ءانشى ومىرىنەن فوتوكورمە ۇيىمداستىرىلسا، «قوڭىر داۋىس» دەرەكتى فيلمى كورسەتىلىپ، وندا ءانشى ءومىرى مەن ونەر جولىنداعى قىزىقتى دا تارتىستى كەزەڭدەر بەينەلەنەدى.
شىعارماشىلىق كەش «مەن قازاقتىڭ قىزىمىن»، «اق تاماق» اندەرى جانە تەاترلاندىرىلعان قويىلىمدارمەن باستاۋ الىپ، ت. بۋرميستروۆا ونەرىنە ارنالعان ولەڭدەردەن پوەتيكالىق كومپوزيتسيا، حالىق اندەرىنەن سازدى ءان شاشۋلار مەن «ايەلدىڭ جاسى 18» سىرلاسۋ اندەر ورىندالادى.
