قازاقتىڭ 60 جاستاعى اجەيى اۋىر جۇك كولىگىمەن تاۋار تاسىمالداپ ءجۇر
الپىستى القىمداعان كەيۋانا اۋدانداعى تەمىرجول قويماسىنان اقتاۋعا جۇك تاسىمالدايدى دەپ جازادى «حابار 24».
اۋىر كولىك تىزگىنىن ەركىن باسقاراتىن نەسىپحان اجەي قىزمەتىنە تياناقتى. قاجەتىنشە تاۋلىك بويى جۇمىسقا شىعۋعا ءازىر. جولدا بۇزىلىپ تۇرعان كولىك جانىنان ءوتىپ كەتۋ -كەيۋاناعا جات قىلىق. كابينادان كيمەشەكتەگى انانىڭ شىققانىن كورگەن جۇرگىزۋشىلەردىڭ باستاپقىدا ابدىرايتىنى راس. دەرەۋ كاپوتتى اشقىزىپ، موتورعا ۇڭىلەتىن قاريا قىلىعىنا ەرىكسىز باس شايقاسادى.
مەرەكە كۇندەرى ەل قاتارلى دەمالۋدىڭ ورنىنا كەيۋانا قىزمەتىنە شىعادى. ۇيىنە ەرتەرەك بارۋعا سۇرانعان جاستاردىڭ ورنىن باساتىن مىنەزى تاعى بار. ۇجىمىندا سىيلى قاريا ءاربىر مەيرام سايىن ەرەكشە قۇرمەتكە بولەنىپ ءجۇر.
«بۇل كىسىنى ءبىزدىڭ جۇك بولىمشەسىنىڭ اناسى دەپ ايتۋعا بولادى. 2007-جىلدان بەرى بىزبەن بىرگە جۇمىس ىستەيدى. حالىققا قىزمەت كورسەتەدى. ساپالى جۇمىس كورسەتىپ، ەڭبەك ەتىپ جاتىر. قايراتتىلىعىمەن، ءوزىنىڭ جاۋاپكەرشىلىگىمەن جۇك الىپ، جۇك جىبەرۋشىلەردىڭ العىسىنا يە بولىپ جۇرگەن ادام»، - دەيدى ماڭعىستاۋ تەمىرجول بولىمشەسى جۇك قويماسىنىڭ مەڭگەرۋشىسى نۇريا نۇرىموۆا.
پويىز كەشىكسە، نەسىپحان اجەي دە جۇمىستا كىدىرەدى. تاپسىرىس بەرۋشىگە جەتكىزەتىن جۇگىنىڭ سانى مەن قۇجاتىنىڭ دۇرىستىعىنا كوز جەتكىزىپ الىپ، جولعا شىعادى. بارعان جەرىندە العىستان كەيىن مىندەتتى قويىلار سۇراقتاردىڭ بولۋىنا ۇيرەنىپ العان.
«ۇيدە وتىرمايسىڭ با دەيدى، بارلىعى دا سۇرايدى. ءوزىم جۇرىسكە ۇيرەنىپ قالعانمىن، ۇيدە وتىرا المايمىن. ءبىر جاعىنان، دەنساۋلىق بولعان سوڭ. وسى جۇمىسىم جارايدى، بەرەكەت بەرسىن!»، - دەيدى زەينەتكەر نەسىپحان ساديروۆا.
جاڭاوزەننەن مۇنايلىعا قونىس اۋدارعان اجەي ءۇش ۇل مەن قىز تاربيەلەپ، كىسى قاتارىنا قوستى. بۇگىندە التى نەمەرە ءسۇيىپ وتىرعان كەيۋانا قازىنالى 70 جاسقا كولىك تىزگىنىندە ءجۇرىپ جەتەرىنە سەنىمدى.
