08:22, 02 - ءساۋىر 2016 | GMT +6
سيرياداعى تاريحي جادىگەرلەردى قالپىنا كەلتىرۋگە 60 ۇيىم نيەت تانىتتى
استانا. قازاقپارات - سيريانىڭ پالميرا قالاسىنداعى تاريحي ەسكەرتكىشتەردى قالپىنا كەلتىرۋگە الەمنىڭ 60 ۇيىمى اتسالىسۋعا دايىن.
حومس پروۆينتسياسىنىڭ گۋبەرناتورى تالال ءال-بارازي وسىنداي مالىمدەمە جاسادى.
يۋنەسكو الەمدىك مۇرالار قاتارىنا قوسقان سيرياداعى 6 تاريحي نىساننىڭ ءبىرى پالميرا 2015 -جىلدىڭ مامىرىنان بەرى «يراك پەن ليەۆانت لاڭكەستىك ۇيىمىنىڭ» باقىلاۋىندا بولعان ەدى. الايدا ۇكىمەت اسكەرى مەن «دالا سۇڭقارلارىنىڭ» جاۋىنگەرلەرى وتكەن جەكسەنبىدە قالانى سودىرلار قولىنان تولىقتاي ازات ەتتى. قارۋلى قاقتىعىس كەزىندە تاريحي نىساندار ەداۋىر زارداپ شەككەن. قازىر ولاردى قالپىنا كەلتىرۋ ءۇشىن قانشا شىعىن كەتەتىنى ەسەپتەلىپ جاتىر. جەرگىلىكتى بيلىك «قالانى قالپىنا كەلتىرمەس بۇرىن ايماقتى جارىلعىش زاتتاردان تازارتۋ كەرەك»، - دەيدى. ەگەر ساپەرلەر ءوز جۇمىسىن اياقتاسا، وندا تۇرعىندار دا كوپ ۇزاماي ۇيلەرىنە ورالادى، دەپ جازادى 24.kz.
