بايقوڭىر 60 جىلدىق مەرەيتويىن اتاپ ءوتتى - فوتو رەپورتاج
مەرەكەگە ماسكەۋدەن ارنايى رەيسپەن عارىش ايلاعىنىڭ 200 دەن استام ارداگەرى، ونى العاش سالعان ازاماتتار: عارىش تەحنيكاسىنىڭ ينجەنەرلەرى مەن كونسترۋكتورلارى، عارىش ايلاعىن اسكەري سىناۋشىلار، اسكەري باسشىلار، عارىشكەرلەر كەلدى.
«بۇرىنعى كەڭەس وداعىنىڭ 46-ايماعىندا تۇراتىن 52 مىڭ ارداگەردىڭ باسىن قوسقان «بايقوڭىر ارداگەرلەر كەڭەسىنىڭ» قۇتتىقتاۋىن قابىل الىڭىزدار»، - دەدى ماسكەۋدەگى ارداگەرلەر كەڭەسىنىڭ ءتوراعاسى، ر ف اسكەري- عارىش كۇشتەرىنىڭ بۇرىنعى باسشىسى، گەنەرال- لەيتەنانت ۆلاديمير يۆانوۆ.
بايقوڭىردىڭ قۇرمەتتى قوناقتارىنىڭ اراسىندا كەڭەستىك زىمىران- عارىشتىق تەحنيكانىڭ نەگىزىن قالاعان سەرگەي پاۆلوۆيچ كوروليەۆتىڭ قىزى، اكەسىنىڭ «جىلناماشىسى» ناتاليا دا بولدى.
ول ءوز سوزىندە اكەسىنىڭ ءدال وسى جەردە ءىرى قۇرىلىس ءجۇرىپ، بولاشاق عارىش ايلاعى ورنالاساتىنىن ايتقانىن جەتكىزدى.
قالا تۇرعىندارى، جۇمىسكەرلەر، بايقوڭىردىڭ ينجەنەر- سىناۋشىلارى، رەسەي جانە قازاقستاننىڭ زىمىران- عارىش سالاسىنىڭ جەتەكشى كاسىپورىندارىنىڭ قىزمەتكەرلەرىمەن بىرگە بايقوڭىرداعى بۇل مەرەكەنى اتاپ وتۋگە قازاقستان رەسپۋبليكاسى پرەمەر- ءمينيسترىنىڭ ءبىرىنشى ورىنباسارى باقىتجان ساعىنتايەۆ پەن ر ف ۇكىمەت باسشىسىنىڭ ورىنباسارى دميتري روگوزين، «قازعارىش» جانە «روس كوسموستىڭ» باسشىلارى تالعات مۇسابايەۆ پەن يگور كوماروۆ قاتىستى.
«بۇگىنگى بايقوڭىر - رەسەي مەن قازاقستان دوستىعىنىڭ مىقتى كورىنىسى، بۇل - ءبىزدىڭ ەلدەرىمىزدىڭ ماماندارىنىڭ كاسىبيلىگى ارقاسىندا سالىنىپ، جۇمىس ىستەپ وتىرعان جانە ەڭ باستىسى حالىقارالىق ىلكى جوبالار ءۇشىن ءالى تالاي قولدانىلاتىن عارىش ايلاعى»، - دەدى بايقوڭىرلىقتاردىڭ الدىندا سويلەگەن سوزىندە ر ف ۇكىمەت باسشىسىنىڭ ورىنباسارى دميتري روگوزين.
«بايقوڭىر» عارىشايلايعىنىڭ تاريحي جانە عىلىمي- تەحنيكالىق ماڭىزىن تۇسىنگەن قازاقستان مەن رەسەي ونى ارى قاراي دامىتۋ بويىنشا جۇمىستاردى جۇرگىزىپ وتىر. قازاقستان مەن رەسەي فەدەراتسياسى پرەزيدەنتتەرىنىڭ قولداۋىمەن اتالعان عارىش ايلاعى الەمدىك عارىش سالاسىنىڭ دامۋىندا كوش باستاپ كەلەدى. ول ەكى ەل اراسىنداعى ءوزارا ءتيىمدى ىقپالداستىقتىڭ، عىلىمي- تەحنيكالىق پروگرەستىڭ سيمۆولى ىسپەتتى»، - دەدى ق ر پرەمەر- ءمينيسترىنىڭ ءبىرىنشى ورىنباسارى.
بالالىق كەزى مەن جاستىق شاعى بۇرىنعى لەنينسك، قازىرگى بايقوڭىر قالاسىندا وتكەن عارىشكەر ولەگ ارتەميەۆ «بايقوڭىر قالاسىنىڭ قۇرمەتتى ازاماتى» مارتەبەلى اتاعىنا يە بولدى.
مەرەكەلىك شارالار بايقوڭىردىڭ تۇنگى اسپانىن جارقىن تۇسكە بوياعان تاماشا وتشاشۋمەن اياقتالدى.
