بۇگىن بايقوڭىر عارىش ايلاعىنا 60 جىل
امزاتتىڭ عالامات تۋىندىلارىنىڭ ءبىرى - بايقوڭىر كوسمودرومى. جەر بەتىندەگى العاش سالىنعان عارىش ايلاعىنان ءالى كۇنگە دەيىن دۇنيەجۇزى بويىنشا ەڭ كوپ زىمىران ۇشىرىلادى.
جەر كىندىگى سانالاتىن بايقوڭىر قازىردە مەرەيتويلىق ءسان-سالتاناتتى كەيىپكە ەنگەن. كەلبەتتى شاھار ارلەنىپ، اباتتانىپ، جاسانىپ، جاسارىپ تۇر. عارىش قاقپاسىنىڭ 60 جىلدىعى كەشەدەن بەرى تويلانۋدا.
بايقوڭىرعا الىس-جاقىننان ارنايى ات ارىتىپ كەلگەن مەيماندار مادەنيەت ۇيىندە باس قوستى. عارىش سالاسىنىڭ ارداگەرلەرى جىلىشىراي قاۋقىلداسىپ، كوسمودرومنىڭ قالىپتاسۋ كەزەڭىنەن سىر شەرتىستى.
سالتاناتتى شارا الدىندا قوناقتار نازارىنا بايقوڭىردىڭ تاريحىنان اقپار بەرەتىن كورمە ۇسىنىلدى. كەلۋشىلەر الىپ كەشەننىڭ ءار كەزەڭدەردەگى دامۋ ساتىسىنا شولۋ جاسادى. ودان ءارى مەرەكەلىك جيىن بارىسىندا رەسمي تۇلعالار بايانداماسى تىڭدالىپ، 20 ادامعا «بايقوڭىرعا - 60 جىل» مەرەيتويلىق توسبەلگىلەرى تابىس ەتىلدى.
جالپى بايقوڭىردان وسى 60 جىل ىشىندە 200 دەن استام ادام كوك سەڭگىرگە سامعادى. زىمىرانداردىڭ 40 ءتۇرى ۇشىرىلدى. قازىردە قازاق ەلى رەسەي فەدەراتسياسىمەن تىزە قوسىپ، عارىشتى يگەرۋ جولىندا تولىمدى تىرلىكتەر تىندىردى.
وسى جوبالاردىڭ ەلىمىزگە ماڭىزدىلىعى جونىندە كەزىندە وبلىستى باسقارعان مەملەكەت جانە قوعام قايراتكەرى سەيىلبەك شاۋحامانوۆتىڭ وي-پىكىرىنە قۇلاق اسقان ەدىك.
سەيىلبەك شاۋحامانوۆ، مەملەكەت جانە قوعام قايراتكەرى:
- رەسەيمەن بىرگە عارىش ايلاعىن يگەرۋ جۇمىستارى قازاقستاندا قولعا الىنىپ جاتىر. بۇل ءبىزدىڭ عىلىمىمىزدى، تەحنيكالىق ءال-اۋقاتىمىزدى دامىتۋ ءۇشىن وتە قاجەتتى شارا. بۇل ۇلكەن عىلىمي-تەحنيكالىق پروگرەسس. بۇدان ءبىز تىس قالا المايمىز. مەملەكەتىمىزدىڭ، مەملەكەت باسشىلارىنىڭ دوستىعى ارقاسىندا بايقوڭىردا كوپشىلىگى ءبىزدىڭ ۇلت وكىلدەرى. بۇل مادەنيەتتى، وركەنيەتتى قالا. ءبىزدىڭ ماماندار وسىندا وقىپ جاتىر، جۇمىس ىستەپ، وسىندا تاربيەلەنىپ جاتىر. ءبىز بىرگەمىز.
مەرەيتويلىق شارالار بۇگىن تاڭسارىدەن باستالدى. قالا تۇرعىندارى مەن قوناقتارى عارىش تەحنيكاسىن قۇراستىرۋشىلار ەسكەرتكىشىنە گۇل شوقتارىن قويدى. سالتاناتتى شارا «ونجىلدىق» ستاديونىندا جالعاستى.
قازاقستان رەسپۋبليكاسى مەن رەسەي فەدەراتسياسىنىڭ تۋى كوتەرىلىپ، ءانۇراندارى شىرقالدى. ايىرىقشا ەڭبەگى سىڭگەن 4 ادامعا «بايقوڭىر قالاسىنىڭ قۇرمەتتى ازاماتى» اتاعى بەرىلدى. شارا اسكەري ءانسامبلدىڭ كونسەرتىمەن جالعاسادى. سونداي-اق بايقوڭىر ساحناسىندا ك س ر و جانە قازاقستاننىڭ حالىق ءارتىسى روزا رىمبايەۆا ءان شىرقايدى. ودان كەيىن جاس ونەرتاپقىشتاردىڭ قولدان جاساپ شىعارعان زىمىران مودەلدەرى ۇشىرىلماق.
www.24.kz