قازاقستان مەن قىتاي 60 ميلليارد دوللاردىڭ جوبالارىن جۇزەگە اسىرۋ ماسەلەلەرىن تالقىلادى

 بەيجىڭ. قازاقپارات - بۇگىن ق ح ر استاناسىندا قازاقستان وكىلدەرى قىتايلىق سەرىكتەستەرىمەن جالپى سوماسى 60 ميلليارد دوللار بولاتىن 52 ەكونوميكالىق جوبانى جۇزەگە اسىرۋ ماسەلەسىن تالقىلايدى.

كەلىسسوزدەر ناتيجەسىندە قابىلدانعان شارالار حاتتاماعا ەنگىزىلىپ، وعان ەرتەڭ ق ر ينۆەستيتسيا جانە دامۋ ءمينيسترى اسەت يسەكەشيەۆتىڭ قىتايعا ساپارى كەزىندە قول قويىلماق.

«يندۋستريالدىق- يننوۆاتسيالىق دامۋدىڭ ەكىنشى بەس جىلدىعى اياسىندا ءبىز ءۇشىن مۇددەلى سالالار بويىنشا جوبالار ۇسىنىلدى»، - دەدى ق ر ينۆەستيتسيا جانە دامۋ مينيسترلىگى يندۋستريالدى دامۋ جانە ونەركاسىپ قاۋىپسىزدىگى كوميتەتى ءتوراعاسىنىڭ ورىنباسارى تيمۋر نۇراشيەۆ.

 ونىڭ سوزىنە قاراعاندا، بۇل جوبالار ءۇش جولمەن جۇزەگە اسۋى مۇمكىن. ول قىتايلىق تاراپتان تىكەلەي ينۆەستيتسيا قۇيۋ، بىرلەسىپ قارجىلاندىرۋ جانە ءوندىرىس وشاقتارىن ق ح ر اۋماعىنان قازاقستانعا كوشىرۋ. بولاشاق ونىمدەردى قازاقستان جانە ەۋرازيالىق ەكونوميكالىق وداق ەلدەرىنىڭ عانا ەمەس، قىتاي نارىعىنا دا شىعارۋ كوزدەلگەن.

قازاقستاندىق دەلەگاتسيا قۇرامىندا شامامەن 40 ادام بولادى. ولاردىڭ ىشىندە ق ر ينۆەستيتسيا جانە دامۋ مينيسترلىگىنىڭ، قازاقستان دامۋ بانكىنىڭ، KEGOC، «بىرلەسكەن حيميالىق كومپانيالار»، «KaznexInvest»، «تاۋ- كەن سامۇرىق، "قازاقستان ينجينيرينگ"، "سامۇرىق- ەنەردجي"، "بايتەرەك" ۇلتتىق حولدينگ، "قازاۆتوجول"، "قازازوت"، "قازاقمىس" جانە وزگە دە كومپانيالاردىڭ وكىلدەرى بار.

قىتايلىق تاراپتان كەلىسسوزدەرگە رەفورمالار جانە دامۋ ىستەرى بويىنشا مەملەكەتتىك كوميتەت، قىتاي حالىق بانكى، ەكسيم بانك، قۇرىلىس بيزنەسىنىڭ قاۋىمداستىعى جانە وزگە دە ءىرى كومپانيالاردىڭ وكىلدەرى قاتىستى.

ەسكە سالا كەتەيىك، بۇگىن، ق ر پرەزيدەنتى نۇرسۇلتان نازاربايەۆ جالپى ۇلتتىق تەلەكوپىردە يندۋستريالاندىرۋدىڭ ەكىنشى بەسجىلدىعىن ىسكە قوستى.

قازىرگى ۋاقىتتا ەكىنشى بەسجىلدىق جوبالارىنا الەمنىڭ 100 دەن استام ءىرى كومپانياسى قارجى قۇيۋعا دايىن.