ءبىلىم جانە عىلىم مينيسترلىگى 608,5 ميلليون تەڭگە قاراجاتىن ماشينالار مەن عيمارات ساتىپ الۋعا جۇمساعان
بۇل تۋرالى رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ باسپا ءسوز قىزمەتىنەن حابارلايدى.
سونداي- اق، ءبىلىم جانە عىلىم، اۋىل شارۋاشىلىعى، ينۆەستيتسيالار جانە دامۋ مينيسترلىكتەرىنىڭ جالپى سوماسى 42,4 ميلليارد استام تەڭگەنى قۇرايتىن عىلىمي زەرتتەۋلەر وتكىزۋدىڭ بيۋدجەتتىك وتىنىمىندەگى ەسەپتىڭ تولىقتىعى مەن دۇرىستىعى قامتاماسىز ەتىلمەگەنى اتاپ وتىلەدى.
باقىلاۋ قامتىعان 54,7 ميلليارد تەڭگە بيۋدجەتتىك قاراجاتتىڭ 51,3 ميلليارد تەڭگەسىنىڭ (نەمەسە 93,8 پايىزى) بيۋدجەتتىك جانە وزگە زاڭناماسى بۇزىلعان، 794,6 ميلليون تەڭگە ءتيىمسىز پايدالانعان. باقىلاۋ بارىسىندا رەسپۋبليكالىق بيۋدجەت كىرىسىنە 7,8 ميلليون تەڭگە وتەلدى، دەپ اتاپ ءوتىلدى ەسەپ كوميتەتىنىڭ كەزەكتى وتىرىسىندا.
وتىرىس قورىتىندىلارى بويىنشا ءبىلىم جانە عىلىم، اۋىل شارۋاشىلىعى، ينۆەستيتسيالار جانە دامۋ مينيسترلىكتەرىنە انىقتالعان كەمشىلىكتەردى، ولارعا اپاراتىن سەبەپتەر مەن جاعدايلاردى جويۋ، قولدانىستاعى زاڭنامانىڭ بۇزۋشىلىقتارىنا جول بەرگەن قىزمەتتىك تۇلعالاردى جاۋاپكەرشىلىككە تارتۋ بويىنشا شارالار قولدانۋ سىندى ءبىرقاتار تاپسىرمالار بەرىلدى.
باقىلاۋدىڭ جەكەلەگەن ماتەريالدارى قۇقىق قورعاۋ ورگاندارىنا جىبەرىلەدى.
