تۇرعىن ءۇي كەزەگىندە 601 مىڭ قازاقستاندىق تۇر

نۇر- سۇلتان. قازاقپارات - الداعى ايدا قازاقستاندىقتارعا جالعا بەرىلەتىن تۇرعىن ءۇي سۋبسيدياسى بەرىلەدى. بۇل تۋرالى قۇرىلىس جانە تۇرعىن ءۇي كوممۋنالدىق شارۋاشىلىق ىستەرى كوميتەتىنىڭ ءتوراعاسى الماس ىدىرىسوۆ ءمالىم ەتتى، دەپ حابارلايدى قازاقپارات ءتىلشىسى.

«مەملەكەت باسشىسى تۇرعىن ۇيگە مۇقتاج جاندارعا ارنالعان باعدارلاما ازىرلەۋدى جۇكتەگەن ەدى. سول تاپسىرماعا سايكەس بۇگىندە جاڭا باعدارلاما ىسكە قوسىلدى. بۇگىندە 601 مىڭ قازاقستاندىق تۇرعىن ءۇي كەزەگىندە تۇر. ونىڭ ىشىندە 215 مىڭى - كوپبالالى وتباسى، 1 جانە 2 توپتاعى مۇگەدەك، جەتىم بالالار جانە مۇگەدەك بالاسى بار وتباسىلار. ودان بولەك، باسپانا كەزەگىندە تۇرعان 70 مىڭ ازامات تابىسى تومەن ساناتقا جاتادى. وسى اتالعان ساناتتاعى ازاماتتارعا مەملەكەت تۇرعىن ءۇي جالداۋعا سۋبسيديا بەرەدى»، - دەدى الماس ىدىرىسوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ونىڭ ايتۋىنشا، جوعارىدا اتالعان 70 مىڭ قازاقستاندىق ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەكتەرىنە ساي انىقتالدى.

«سۋبسيدياعا كەلسەك، جالعا بەرىلەتىن پاتەر اقىسىنىڭ 50 پايىزىن مەملەكەت كوتەرەدى، قالعانىن ازاماتتىڭ ءوزى تولەيدى. بۇل باعدارلاما ءۇشىن مەملەكەتتىك بيۋدجەتتەن 50 ميلليارد تەڭگە قاراستىرىلعان. اتالعان سومانىڭ 40 ميلليارد تەڭگەسى رەسپۋبليكالىق بيۋدجەتتەن بولىنەدى، قالعان 10 ميلليارد تەڭگە جەرگىلىكتى بيۋدجەتتەن قاراستىرىلادى. جالعا بەرىلەتىن تۇرعىن ۇيگە سۋبسيديا الۋعا ءوتىنىمدى وتباسى بانكى قابىلداۋدى باستاپ كەتتى. ول ءۇشىن سيفرلىق پلاتفورما ازىرلەندى. وتباسى بانك باستى وپەراتور رەتىندە باسپاناعا مۇقتاج وتباسىلاردى انىقتايدى جانە ولاردىڭ تابىسىن تەكسەرەدى. بۇگىندە ازاماتتاردان ءوتىنىم قابىلدانىپ جاتىر، شاشامەن مامىر ايىندا سۋبسيديا بەرىلە باستايدى»، - دەيدى ول.

ەسكە سالا كەتەيىك، جالعا بەرىلەتىن تۇرعىن ءۇيدى سۋبسيديالاۋعا ءوتىنىم قابىلداۋ باستالعانى تۋرالى حابارلاعان ەدىك.

اۆتور: ءالي يبرايەۆ