شىمكەنتتە 600 گە جۋىق جاڭا اۆتوبۋستىڭ جارتىسى نەگە قاڭتارىلىپ تۇر

نۇر-سۇلتان. قازاقپارات - جىل اياعىنا دەيىن شىمكەنت قالاسىندا 590 گازبەن جۇمىس ىستەيتىن اۆتوبۋس جولاۋشى تاسىمالدايتىن بولادى، دەپ حابارلايدى قازاقپارات.

بۇل تۋرالى شىمكەنت قالاسىنىڭ اكىمى مۇرات ايتەنوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ايتتى.

«بىلتىر 590 اۆتبوۋس ساتىپ الىنعان. ونىڭ 300 ى قازىر جۇيەگە ءتۇستى. 290 ى جىلدىڭ اياعىنا دەيىن قولدانىسقا شىعادى. ونىڭ ءبارى - گازبەن جۇرەتىن قوعامدىق كولىك. ىشىندە اۋا باپتاعىشى بار، مۇگەدەكتەرگە قولايلى. نەگە 290 كولىكتى كەشىگىپ ەنگىزەمىز؟ سەبەبى قالادا قوعامدىق كولىككە گاز قۇياتىن ستانسانىڭ قۇرىلىسى ەندى اياقتالدى. ەكىنشىسىن ۇلعايتۋ جۇمىستارى ەندى عانا باستالدى. جىل اياعىنا دەيىن ءبىتۋى كەرەك. سول كەزدە عانا قالعان اۆتوبۋستى جولعا شىعارۋعا بولادى»، - دەدى قالا اكىمى. مۇرات ايتەنوۆ قالا تۇرعىندارى قوعامدىق كولىك اقىسىن ەلەكتروندى جولمەن تولەۋگە جىلدام بوي ۇيرەتكەنىن ايتتى.

«قوعامدىق كولىك ىڭعايلى بولۋى ءۇشىن بىلتىر قازاندا ەلەكتروندىق تولەم ەنگىزدىك. سونىڭ ارقاسىندا قازىر 80 پايىزى ەلەكتروندى تولەم ارقىلى قاتىناپ ءجۇر. 300 مىڭنان استام تۇرعىن تولەم كارتاسىن پايدالانىپ وتىر. وعان قوسىمشا ارنايى باعدارلاما ەنگىزدىك. قاي كولىك قاي جەردە جۇرگەنىن كورسەتىپ وتىرادى. ول ءۇشىن تەلەفونعا ءتيىستى قوسىمشانى جۇكتەسە بولدى. سول ارقىلى تۇرعىندار اۆتوبۋستىڭ ناقتى ۋاقىتىن كورىپ، جوسپارىن ءتيىمدى قۇرا الادى. قازىر قوسىمشا ىڭعايلى بولۋ ءۇشىن ايالدامالاردىڭ اتىن تۇرعىنداردىڭ داۋىس بەرۋى ارقىلى انىقتاپ جاتىرمىز. تەحنيكالىق ماسەلەلەرى شەشىلگەننەن كەيىن ونى دا ەنگىزەمىز. جايلاپ- جايلاپ قالامىزداعى قوعامدىق كولىكتىڭ 80 پايىزى جاڭا، زاماناۋي، ۇلكەن اۆتوبۋستارمەن الماستىرىلادى»، - دەدى اكىم.

اۆتور: ەسىمجان ناقتىباي