نۇر-سۇلتاندا ستاتسيونارلىق كارانتيندە 600 دەن استام ادام جاتىر

بۇل تۋرالى نۇر-سۇلتان قالالىق قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ءمالىم ەتتى، دەپ حابارلايدى قازاقپارات ءتىلشىسى.

«21- ناۋرىزدا ساعات 08.00 دەگى جاعداي بويىنشا ەلوردا اۋرۋحانالارىندا بارلىعى 645 ادام جاتىر، ونىڭ 62 ءسى - بالالار. وسى ۋاقىتقا دەيىن نۇر-سۇلتان قالاسىندا 28 ادامدا كوروناۆيرۋس ينفەكتسياسى انىقتالدى»، - دەدى باسقارما باسشىسى قالا اكىمدىگىندە وتكەن ونلاين-بريفينگتە.

جاس ەرەكشەلىكتەرى بويىنشا، 18 جاسقا دەيىنگى ەكى ناۋقاس (4 ايلىق نارەستە، 14 جاستاعى جاس ءوسپىرىم)، 18-29 جاس ارالىعىندا - ءۇش ناۋقاس، 30-49 جاس ارالىعىندا - 18 ناۋقاس، 50-59 جاس ارالىعىندا - ءتورت ادام جانە 60 جاستان اسقان ءبىر ناۋقاس بار.

بۇعان دەيىن ساۋلە قيسىقوۆا 20- ناۋرىز كۇنى كوروناۆيرۋس ينفەكتسياسى انىقتالعان 3 ناۋقاستىڭ جاي- كۇيىن ايتىپ بەردى. 4 ايلىق نارەستەسى بار وتباسى 19- ناۋرىزدا پاريج-مينسك-نۇر-سۇلتان رەيسىنەن ءتۇسىرىلىپ، اۋرۋحاناعا جەتكىزىلگەن.