شاعىن جانە ورتا بيزنەستى جەڭىلدىكپەن كرەديتتەۋگە 600 ميلليارد تەڭگە ءبولىندى - ۇلتتىق بانك
كورونوۆيرۋس پاندەمياسىنا جانە ونىڭ قازاقستان ەكونوميكاسىنا تەرىس ىقپالىنا بايلانىستى توتەنشە جاعداي ناتيجەسىندە زارداپ شەككەن شاعىن جانە ورتا كاسىپكەرلىك سۋبەكتىلەرىن، دارا كاسىپكەرلەردى قولداۋعا ارنالعان قازاقستان رەسپۋبليكاسىنىڭ پرەزيدەنتى ق. ك. توقايەۆتىڭ تاپسىرماسى بويىنشا ۇلتتىق بانك ق ر قارجى نارىعىن رەتتەۋ جانە دامىتۋ اگەنتتىگىمەن بىرلەسىپ شاعىن جانە ورتا كاسىپكەرلىك سۋبەكتىلەرىن جەڭىلدىكپەن كرەديتتەۋ باعدارلاماسىن ازىرلەدى. «اتالعان باعدارلامانى ىسكە اسىرۋ ءۇشىن ەكىنشى دەڭگەيدەگى بانكتەردە نەگىزدەلگەن سالىمداردى ورنالاستىرۋ ارقىلى 600 ملرد تەڭگە ءبولىندى. بيزنەستى قولداۋ تەتىگى ەكىنشى دەڭگەيدەگى بانكتەردىڭ توتەنشە جاعدايدىڭ ەنگىزىلۋى ناتيجەسىندە زارداپ شەككەن شاعىن جانە ورتا كاسىپكەرلىك سۋبەكتىلەرىنە، دارا كاسىپكەرلەرگە 12 ايعا دەيىنگى مەرزىممەن جىلدىق %8 دان اسپايتىن مولشەرلەمە بويىنشا اينالىم قاراجاتىن تولىقتىرۋعا جەڭىلدىكپەن كرەديتتەر بەرۋى ارقىلى ىسكە اسىرىلادى. ەكىنشى دەڭگەيدەگى بانكتەردىڭ قاراجاتتى يگەرۋ مەرزىمى 3 اي»، دەلىنگەن ۇلتتىق بانك تاراتقان حابارلامادا.
جەڭىلدىكپەن كرەديتتەۋ باعدارلاماسىنىڭ وپەراتورى بولىپ ۇلتتىق بانك جانىنداعى «قازاقستاننىڭ ورنىقتىلىق قورى» ا ق ايقىندالدى، سونداي-اق اكتيۆتەر ساپاسىن تاۋەلسىز باعالاۋدان (Asset Quality Reviews) وتكەن جانە پورتفەلىندە شاعىن جانە ورتا كاسىپكەرلىك سۋبەكتىلەرىنە بەرىلگەن قارىزدارى بار 13 قاتىسۋشى بانك بەلگىلەندى.
«باعدارلاماعا قاتىسۋشى بانكتەردىڭ بولىنگەن قاراجاتتى مەملەكەتتىك جانە مەملەكەتتىك ەمەس باعالى قاعازداردى ساتىپ الۋعا، باسقا بانكتەردەگى دەپوزيتتەرگە ورنالاستىرۋعا، شەتەل ۆاليۋتاسىن ساتىپ الۋعا پايدالانۋىنا جانە وزگە ماقساتقا ساي پايدالانباۋىنا تىيىم سالىنادى. ق ر قارجى نارىعىن رەتتەۋ جانە دامىتۋ اگەنتتىگى «قازاقستاننىڭ ورنىقتىلىق قورى» ا ق-پەن بىرلەسىپ كاسىپكەرلەرگە بەرىلگەن جەڭىلدىكتى كرەديتتەردىڭ ۋاقتىلى جانە نىسانالى پايدالانىلۋىنا اي سايىنعى نەگىزدە مونيتورينگ جۇرگىزەتىن بولادى»، دەلىنگەن حابارلامادا. ۇلتتىق بانكى بولىنگەن قاراجاتتىڭ سوڭعى قارىز الۋشىعا جەتكىزىلۋى بويىنشا بارلىق قاجەتتى شارالاردى قابىلدايتىن بولادى.
