وڭتۇستىك كورەيادا كوروناۆيرۋستى جۇقتىرۋدىڭ 600 وقيعاسى تىركەلدى

وسىلايشا ەلدە اۋرۋعا شالدىققانداردىڭ سانى 4812 ادامعا جەتتى، دەپ حابارلايدى قازاقپارات Yonhap-قا سىلتەمە جاساپ.

سوڭعى دەرەكتەرگە قاراعاندا، ۆيرۋستان وڭتۇستىك كورەيادا 28 ادام كوز جۇمعان.

ەلدە اۋرۋدى جۇقتىرۋدىڭ 60 پايىزعا جۋىق وقيعاسى تەگۋ قالاسىنداعى سينچحوندجي (Shincheonji) ءدىني سەكتاسىنىڭ مۇشەلەرىمەن بايلانىستى بولىپ وتىر. تەگۋ - وڭتۇستىك كورەياداعى 2,5 ميلليونعا جۋىق تۇرعىنى بار ءىرى قالا.

ەلدىڭ ادىلەت مينيسترلىگىنىڭ مالىمەتىنشە، بۇل ءدىني سەكتانىڭ بىرنەشە مۇشەسى وتكەن اپتادا قىتايدا كوروناۆيرۋس شىققان قالا ۋحاندا بولعان.

كورەيانىڭ اۋرۋلاردى قاداعالاۋ جانە الدىن الۋ ورتالىعىنىڭ مالىمەتى بويىنشا، ەلدە ىندەت جۇقتىرۋدىڭ 519 جاڭا وقيعاسى تەگۋ قالاسىندا، جانە تاعى 61 ءى - وعان كورشىلەس سولتۇستىك كەنساندو پروۆينتسياسىندا تىركەلدى.

سەۋل قالاسىندا كوروناۆيرۋستى جۇقتىرۋدىڭ تاعى جەتى وقيعاسى تىركەلگەن.

وڭتۇستىك كورەيالىق ساراپشىلار ەلدە كوروناۆيرۋستى جۇقتىرۋدىڭ راستالعان وقيعالارى الداعى كۇندەرى وسەتىنىن بولجاپ وتىر. دەنساۋلىق ساقتاۋ ورگاندارى تەگۋ قالاسىنداعى يسا سينچحوندجي شىركەۋىنىڭ (Shincheonji Church of Jesus) 210 مىڭنان استام مۇشەسىن تەكسەرۋگە كىرىستى.

بۇعان دەيىن حابارلانعانداي، وڭتۇستىك كورەياداعى قازاقستاندىقتاردى كوروناۆيرۋس سالدارىنان كونسۋلدىق ەسەپكە تۇرۋدى سۇراپ جاتىر.