قىزىلوردا وبلىسى كومىرسۋتەگى ءوندىرىسىن 600 مىڭ تونناعا دەيىن ازايتۋى مۇمكىن

استانا. قازاقپارات - بيىل قىزىلوردا وبلىسىندا ونەركاسىپ ءونىم كولەمى 6,1 پايىزعا كەمىگەن. وعان ايماقتا مۇناي مەن ۋران ءوندىرۋ كولەمىنىڭ ازايۋى تىكەلەي اسەر ەتىپ وتىر.

ماسەلەن، وڭىردە سوڭعى 5 جىلدا قارا التىن ءوندىرۋ 3,7 ميلليون تونناعا تومەندەدى. بۇل رەسپۋبليكا بويىنشا كەمىتىلگەن مۇناي كولەمىنىڭ 70 پايىزىن قۇرايدى.

 قىزىلوردا وبلىسى بيىل تاعى كومىرسۋتەگى ءوندىرىسىن 600 مىڭ تونناعا دەيىن ازايتۋى مۇمكىن. ويتكەنى 30 جىلدان بەرى يگەرىلىپ كەلە جاتقان كەن ورىندارىنان شىعاتىن مۇنايدىڭ 98 پايىزى سۋلانا باستاپتى. سونداي- اق سىر وڭىرىندە ۋران ءوندىرۋدى 20 پايىزعا تومەندەتۋ جوسپارلانعان. بۇعان سەبەپ - الەمدە ۋران باعاسىنىڭ ارزانداۋى. دەگەنمەن ماماندار ەكونوميكانى ءارتاراپتاندىرۋ ارقىلى ونەركاسىپ سالاسىن سەرپىلتۋ شارالارىن جالعاستىرۋدا.

رينات سۇلتانگەرەيەۆ، وبلىستىق ي ي د باسقارماسىنىڭ باسشىسى:

 - بيىل شىنى زاۋىتى مەن تامپوناجدى سەمەنت زاۋىتى جوبالارىن وندىرىسكە شىعاراتىن بولساق، ءبىزدىڭ وڭىرىمىزدە وڭدەۋ ونەركاسىبىنىڭ كولەمى ۇلعاياتىن بولادى. مۇناي سالاسىندا مۇناي كولەمىنىڭ تومەندەۋىنە بايلانىستى سەرۆيستىك كومپانيالار جۇمىسسىز قالىپ جاتىر. ەندى وسى ءىرى جوبالاردىڭ اياسىندا جۇمىسسىز قالعان سەرۆيستىك كومپانيالاردى باعىتتايمىز.

www.24.kz