ەكولوگتار «ارسەلورميتتال تەمىرتاۋ» كومپانياسىنا 600 ميلليون تەڭگە ايىپپۇل سالدى
وبلىستىق ەكولوگيا دەپارتامەنتىنىڭ حابارلاۋىنشا، قارا ءتۇستى قاردىڭ جاۋۋىنا بۇل ايىپپۇلدىڭ ەشقانداي قاتىسى جوق. ەكولوگتاردان، مەتەورولگتار مەن پروكۋرورلاردان قۇرالعان جۇمىس توبى قارا ءتۇستى قاردىڭ جاۋۋ سەبەبىن قازىرگى ۋاقىتتا انىقتاپ جاتىر. جۇمىس توبى قاراعاندى وبلىسىنىڭ اكىمى ەرلان قوشانوۆتىڭ تاپسىرماسى بويىنشا قۇرىلىپ، كۇن سايىن جۇمىس جۇرگىزۋگە مىندەتتەلگەن بولاتىن.
وبلىستىق ەكولوگيا دەپارتامەنتى باسشىسىنىڭ ورىنباسارى الىبەك بەكمۇحامبەتوۆتىڭ ايتۋىنا قاراعاندا، ايىپپۇل قورشاعان ورتانى لاستاعانى ءۇشىن سالىنعان.
«اتموسفەراعا بولىنگەن زياندى شىعارىلىمداردىڭ ارتقانى بەلگىلى بولىپ وتىر. رۇقسات ەتىلگەن شىعارىلىمداردىڭ نورماتيۆتەن ارتقانى جانە تابيعات قورعاۋ شارالارىنىڭ جوسپارى ورىندالماعانى انىقتالدى. بۇزۋشىلىقتاردى رەتكە كەلتىرۋ بويىنشا تاپسىرما (پرەدپيسانيە) بەرىلدى»، - دەيدى الىبەك بەكماۇحامبەتوۆ.
ايىپپۇلدىڭ مولشەرى 105 ميلليون تەڭگەنى قۇرايدى. ال قالعان سوما - ەكولوگياعا كەلتىرىلگەن زيان ءۇشىن تولەنەتىن وتەماقى.
ەسكە سالا كەتسەك، بۇعان دەيىن تەمىرتاۋدا قارا ءتۇستى قاردىڭ جاۋۋىنا جەلتوقسان ايى بويى جەل جىلدامدىعىنىڭ باياۋ بولۋى سەبەپ بولۋى مۇمكىن دەگەن پىكىر ايتىلعان بولاتىن. جەل تۋرالى نۇسقانى 9 - قاڭتار كۇنى ءوڭىر اكىمدىگىندە قاراعاندى مەتەورولوگيا ورتالىعى ديرەكتورىنىڭ ورىنباسارى ۆالەريي ستراتيەنكو ايتقان ەدى.
ايان بەكەن ۇلى
