قازاقستاندا 600 قاسيەتتى ورىننىڭ ءتىزىمى جاسالدى
دەپ حابارلايدى «قازاقپارات» ح ا ا ءتىلشىسى.
«ەلباسىنىڭ «بولاشاققا باعدار: رۋحاني جاڭعىرۋ» باعدارلاماسىنىڭ باعىتتارىنىڭ ءبىرى قازاقستاننىڭ قاسيەتتى جەرلەرىن انىقتاۋ بولىپ تابىلادى. بارلىق باعدارلامالار ءبىر- بىرىمەن بايلانىستى. «تۋعان جەر»، «ءجۇز ەسىم» باعىتتارىمەن بىرگە لاتىن ءالىپبيىن تالقىلاپ جاتىرمىز. وقۋلىقتار اۋدارىلىپ جاتىر. مۇنىڭ ءبارى كەشەندى جوسپار. سونىڭ ءبىر باعىتىن - قازاقستاننىڭ قاسيەتتى جەرلەرىن انىقتاۋ ءۇشىن ارنايى ۆەدومستۆوارالىق جۇمىس توبى قۇرىلدى. جۇمىس توبىنىڭ جەتەكشىسى - ق ر مادەنيەت جانە سپورت ءمينيسترى. بۇگىنگى تاڭدا ءبىز ازىرلەگەن نۇسقاۋلىق بويىنشا 1000-عا جۋىق مالىمەت كەلىپ ءتۇستى. بۇگىن دە جەتەكشى عالىمدار مەن قوعام قايراتكەرلەرىنەن قۇرىلعان ساراپتامالىق كەڭەستىڭ شەشىمىمەن 100 جالپى ۇلتتىق دەڭگەيدەگى، 500 جەرگىلىكتى ماڭىزى بار قاسيەتتى ورىنداردىڭ ءتىزىمى جاسالدى. ءىس جۇزىندە حالىق بۇل جەرلەردى بۇعان دەيىن انىقتاپ قويعان. ءبىزدىڭ مىندەتىمىز - قاسيەتتى ورىندارىنىڭ ءبىرىڭعاي جەلىسىن قۇرۋ. بولاشاقتاعى مىندەت - ولاردى كەڭىنەن ناسيحاتتاۋ»، - دەيدى بەرىك ءابدىعالي.
ونىڭ ايتۋىنشا، ساراپتامالىق توپ كيەلى جەرلەردىڭ ءتىزىمىن جاساۋ ءۇشىن ءبىرقاتار جۇمىستاردى جۇرگىزگەن.
«وسى باعىتتا ارنايى جۇمىس توپتارى قۇرىلىپ، ولار جەرگىلىكتى ماماندارمەن، ولكەتانۋشىلارمەن، اقساقالدارمەن اقىلداسىپ، ءوز ۇسىنىستارىن بەردى. بۇگىنگى كۇنى ۇسىنىستار جينالىپ، ساراپتامالىق جۇمىستاردان ءوتىپ، كەڭەستىڭ شەشىمىمەن جالپى ۇلتتىق جانە جەرگىلىكتى دەپ ەكىگە بولىنگەن. قاسيەتتى ورىنداردى ناقتىلاۋ ءۇشىن وڭىرلەردە ەكسپەديتسيالىق جۇمىستار باستالىپ كەتتى. ەكسپەديتسيانىڭ باستى ماقساتى - جۇمىس توپتارى ۇسىنعان ءتىزىمدى ماماندارمەن اقىلداسىپ، اڭىزداردى جيناۋ»، - دەيدى بەرىك ءابدىعالي.
