قىتايلىق 600 گرادۋستىق پەشكە ءتۇسىپ، امان قالدى

 استانا. قازاقپارات - گونكونگتىق ايەل 10 - قىركۇيەك كۇنى داوسيس عيباداتحانانىڭ 600 گرادۋستىق ۇلكەن ىستىق پەشىنە قۇلاپ، امان قالدى، دەپ حابارلايدى قازاقپارات.

شينحۋا اقپاراتتىق اگەنتتىگىنىڭ حابارلاۋىنشا، وقيعا ورنىنا 4 مينۋتتا جەتكەن قۇتقارۋشىلار ايەلدى امان الىپ قالعان. ءورت ءسوندىرۋ ماشيناسى سۋمەن پەشتىڭ تەمپەراتۋراسىن تومەندەتىپ، ءۇش قۇتقارۋشى ايەلدى پەشتىڭ ىشىنە كىرىپ الىپ شىققان. قۇتقارۋ جۇمىستارى نەبارى 3 مينۋتتا جۇرگىزىلگەنىمەن، ايەل قاتتى كۇيىپ قالعان. دارىگەرلەر ونىڭ جاعدايىن اۋىر دەپ باعالاپ وتىر. سونداي- اق، ءۇش قۇتقارۋشى دا ءتۇرلى دەڭگەيدە كۇيىك جاراقاتىمەن اۋرۋحاناعا جەتكىزىلگەن. جەرگىلىكتى پوليتسيانىڭ ايتۋىنشا، ايەل ءوز- وزىنە قول جۇمساماقشى بولۋى مۇمكىن. ايتا كەتەيىك، قىتايدىڭ داوسيستىك نانىمى بويىنشا، دۇنيەدەن وتكەن ادامداردىڭ تۋىستارى عيباداتحانانىڭ ارنايى پەشى «حۋا باۋلۋ (化宝炉) » ارقىلى تاساتتىق بەرەدى.

 

 اۆتور: مۇحتار قاليموللا ۇلى